संतोष राज र सेलिना कुँवरको दुई गित 'T-Series' बाट रिलिज

न्यूज ब्यूरो, जनकपुरधाम । सिने जगतका ठूलठूला हस्तीहरुसँग काम गरिसकेका नेपालका संगितकार संतोष राज र चर्चित गायिका सेलिना कुँवरको दुई नयाँ भोजपुरी गीत विश्वकै ठूलो संगित कम्पनी टि–सिरिजबाट रिलिज भएको छ ।

उदित नारायण झा, कुमार सानु जस्ता हस्तीहरुसँग गीत गाइसकेकी गायिका कुँवर र थुप्रै सुपरस्टारहरुसँग काम गरिसकेका संगितकार तथा गायक संतोष राजको ‘कैशन प्यार र धुकुर धुकुर’ नामक दुई गीत भर्खरै टि–सिरिजबाट रिलिज गरिएको हो ।

स्व. गुलसन कुमारको विश्वको सबभन्दा ठूलो संगीत कम्पनी मानिएको टि–सिरिज कम्पनीद्धारा रिलिज यी दुई गीत मध्ये एक गीतमा संतोष राज र कुँवर तथा अर्को गीतमा गायिका कुँवर एक्लैले स्वर दिएकी छन् ।

दुबैजनाको स्वरमा रहेको ‘कैशनमा प्यार’ नामक गीतलाई चर्चित भारतीय गीतकार विनय विहारीको शब्दले सिंगारिएको छ भने मात्रै गायिका सेलिना कुँवरको स्वरमा रहेको ‘धुकुर धुकुर’ नामक गीतमा संतोष राजको शब्द रहेको छ ।

कैशन प्यार गीत जुलाई ६ शनिबार रिलिज गरिएको हो भने धुकुर धुकुर जुलाई ५ शुक्रबार रिलिज गरिएको हो । यी दुबै गीत चर्चित हमार भोजपुरी (hamaarbhojpuri) नामक यूट्युव च्यानलमा राखिएको छ ।

विभिन्न भाषाका दर्जनौं गीती एल्बममा आफ्नो स्वर सजाएकी कुँवर र संगित तथा आवाज भरेका संतोष राजका दुबै गीतलाई श्रोताले निकै मन पराएका छन् ।

संगित क्षेत्रमा निकै रुचाइएकी गायिका सेलिना कुँवर गायनमा उपल्लो तहका चर्चित सर्जकहरुसँग स्वर दिइसकेकी छन् भने संगितकार संतोष राज विभिन्न भाषाका सुपरस्टार हस्तीहरुसँग काम गरिसकेका छन् ।