जलेश्वरमा दुई घण्टा चक्काजाम , सवारी साधन जकथक

न्यूज ब्यूरो । स्थानीय विद्यार्थी तथा युवाहरुद्धारा जलेश्वरको जिरोमाईल चौकमा दुई घण्टा चक्काजाम गरिएको छ ।

विहिबार विहान १० बजेदेखि दिउँसो १२ बजेसम्म जलेश्वर जनकपुर सडक र जलेश्वर नगरपालिका बजार क्षेत्र भित्र रहेको एडिबी परियोजना अन्तर्गतको सडक समयमै नबनेको एवं धुलोका कारण आम सर्वसाधारणको जनजीवनमा गम्भिर असर पारेको भन्दै त्यसको विरोधमा जलेश्वरको जिरोमाईल चौकमा दुई घण्टे चक्काजाम आन्दोलन गरिएको हो ।

चालु आर्थिक वर्षको बैशाखमा महोत्तरीका प्रमुख जिल्ला अधिकारी कहाँ स्थानीयवासी अगाडि नै ठेकेदारले असारे पानी आउनुभन्दा पहिला नै जेठ महिनाको १५ गते भित्रमा पिच (कालोपत्रे) को काम सकिसक्ने भनेर सम्झौता तथा प्रतिवद्धता जाहेर गरेपनि अन्तिम असार जान लाग्दा समेत सडक नबनाएको भन्दै उनीहरु आन्दोलित भएका हुन् ।

रोसन कन्स्ट्रक्सन हिरा भगतले ठेक्का लिएको उक्त सडकमा पानीको समयमा आवातजावत समेत बन्द हुने गरेको तथा सुख्खा मौसममा धुलो धुवांका कारण स्वाथ्य अवस्थामा प्रतिकुल असर पारेको भन्दै स्थानीय युवा र विद्यार्थीहरुले चक्काजाम गरेको नेपाल विद्यार्थी संघ महोत्तरीका अध्यक्ष आशुतोष झा (नविन) ले जानकारी दिए । चक्काजामका कारण दुवैतर्फका सवारी साधन २ घण्टासम्म जकथक परेको थियो ।

उनीहरुले ठेकेदार सडकको काम बीचमै छाडेर भागेको भन्दै दुई दिनभित्र काम सुचारु गर्नुपर्ने तथा नगरेको खण्डमा पुनः चक्काजाम गर्ने चेतावनी समेत दिएका छन् ।