जनकपुरका सँजय 'टकला' लाई दोस्रो जन्मकैद !

न्यूज ब्यूरो, जनकपुरधाम । पूर्व राज्यमन्त्री एवम् पूर्व साँसद समेत रहेका जनकपुरका सँजय साह (टकला) लाई अदालतले पुनः अर्को मुद्दामा पनि जन्मकैदको सजाय सुनाएका छन् ।

जनकपुर टुढे सँचार समूहका अध्यक्ष एवम् सञ्चार उद्यमी अरुण सिंघानिया हत्याकाण्डमा टकलालाई अदालतले जन्मकैदको सजाय सुनाएको हो । सिंघानिया हत्याको करिब १० वर्षपछि गत जेठ १४ जेठदेखि जिल्ला अदालत धनुषामा सुरु भएको सुनुवाईको झण्डै ४ दिनपछि फैसला सुनाएको हो ।

यसअघि ५ जनाको ज्यान जाने गरी भएको जनकपुर बमकाण्डमा पनि जन्मकैदको सजाय सुनाएको थियो । सिंघानीया हत्या काण्ड मुद्दाको सुनवाइ गर्दै धनुषा जिल्ला अदालतका मुख्य न्यायाधीश राधाकृष्ण उप्रेतीको इजलासले पूर्वसांसद संजय सहित २ जनालाई जन्मकैदको सजाय सुनाएको छ । अदालतले हत्यामा संलग्न रहेको भन्दै मनक लामालाई पनि जन्मकैदको सजाय सुनाएको हो ।

संजयले भनेपछि आफूले सिंघानियाको हत्या गरेको अदालत समक्ष बयान दिएका थिए । साह अहिले काठमाण्डौँको डिल्लीबजारस्थित कारागारमा छन् भने लामा पुर्पक्षका लागि महोत्तरीको जलेश्वर कारागारमा छन् । त्यस्तै संजयको नजिकका भनिएका रामविनोद यादवलाई ३ वर्ष, एकलाल सहनीलाई १० वर्ष, चनरदीप यादवलाई १० वर्ष, पवन लामालाई १० वर्ष र मुकेश चौधरीलाई २० रुपैयाँ जरिवानाको सजाय अदालतले सुनाएको छ ।

घटनमा संलग्न भनिएपनि रामकरण, ओमप्रकाश यादव र अंसी राईनले सफाइ पाएका छन् भने दिपेन्द्रलाई मुलतबीमा राखिएको छ । व्यवसायी सिंघानीयाको २०६६ फागुन १७ गते जनकपुरको शिवचोकमा गोली प्रहार गरी होलीकै दिन हत्या भएको थियो ।

सँजय साह जनकपुर बम प्रकरणमा मुछिएदेखि जेलमा बस्दा समय उनको नाम भजाएर जनकपुरका केही युवाहरुले सँजय साह नयाँ राजनीतिक पार्टी समेत खोल्ने लागेको भनेर मिथ्या प्रचार समेत गरेका थिए । साह जेलबाट रिहा हुने संकेत नपाएपछि उनीहरुले अन्य राजनीतिक पार्टीको शरण लिएका छन् ।