धनुषाको तिनकौरियामा पत्थर र रोडा सहित दुईतर्फा झडप !

न्यूज ब्यूरो, जनकपुरधाम । धनुषाको विदेह नगरपालिकाको तिनकोरिया चोकमा रोडा पत्थर सहित दुईतर्फा झडप भएको छ ।

विदेह नगरपालिकाको वडा नं. ६ स्थित रहेको जनता मावि गिद्धा बेलापट्टिका विद्यार्थी तथा केही स्थानीयहरुबीच दुईतर्फा झडप भएको प्रहरी कार्यालय तिनकौरियाले पुष्टि गरेको छ । केही दिनदेखि विद्यालयका शिक्षकहरु आन्दोलनमा बसेपछि विद्यार्थीहरुको पठनपाठन ठप्प भएपछि आक्रोसित विद्यार्थीहरुले नगरपालिका कार्यालय विरुद्ध चर्को नारावाजी गरेका हुन् ।

नगरपालिकाले विद्यालयको अनुदान रकम , शिक्षकहरुको तलबभत्ता रोकेको भन्दै शिक्षकहरु आन्दोलनमा बसेकोले आफूहरुको पठनपाठन अवरुद्ध भएको जीकिर गर्दै विद्यार्थी तथा अभिभावकहरुले सामुहिक रुपममा नगर प्रमुख बेचन दासलाई ज्ञापन पत्र बुझाउन गएका थिए । विद्यार्थीहरुको जमातले ज्ञापन पत्र बुझाउन जाँदा मेयर दास समर्थित केही व्यक्तिहरुले उनीहरुलाई रोक्ने प्रयास गर्दा झडप भएको जनाइएको छ ।

दास समर्थित व्यक्तिहरुले विद्यार्थीहरुलाई रोक्नुका साथै हातपात समेत गरेको तथा दुई विद्यार्थीलाई हातमा चोट लागेपछि उनीहरु झन उग्र बेनेको बताइएको छ । त्यसपछि मेयर समर्थित व्यक्तिहरु र विद्यार्थीबीच करिब आधा घण्टासम्म दोहोरो पत्थरबाजी भएको थियो । एकातर्फ विद्यार्थी र अभिभावक थिए भने अर्को तर्फ मेयर समर्थित व्यक्तिहरु थिए ।

झडप सुरु भएलगत्तै नजिकै रहेको प्रहरीले एक्सन लिएका थिए । प्रहरीले प्रदर्शनकारीहरुलाई तितरवितर गरेका गर्न सफल भए । तर, मेयर र विद्यार्थीबीच सम्झौता गर्न टोली बनाउने आवश्वासन दिएपछि झडप रोकिएको थियो । अहिले जिल्ला प्रहरी कार्यालय धनुषाको प्रहरी टोली समेत घटनास्थल पुगेको छ भने विद्यार्थीहरुको मागको विषयमा वार्ता जारी छ ।

नगरपालिका कार्यालयले विद्यालयका प्रधानाध्यापक पवन मण्डल व्यापक भ्रष्टाचार गरेको भन्दै उनलाई नगरभित्रैको अन्य विद्यालयमा सरुवा गरेको बताएका छन् भने प्रअ मण्डल आफूलाई कानुन विपरित सरुवा गर्न नमिल्ने बताउँदै त्यही विद्यालयमा कार्यभार सम्हालेका छन् । मेयर दासलाई कमिशन नदिएको भन्दै विद्यालयको रकम रोक्का राखेको आरोप प्रअ मण्डलले लगाउँदै आएका छन् भने मेयर दासले प्रअ मण्डलले विद्यालयमा भ्रष्टाचारी गरेको आरोप पनि लगाउँदै आएका छन् ।

हालाकी, अहिलेसम्म कुनै पक्ष त्यसको प्रमाण भने पेश गर्न सकेको छैनन् । मेयर र प्रअ बीचको विवाद दिनानुदिन उग्र रुप लिंदै गएपनि सरोकारबालाहरुको ध्यान भने आज मात्र परेको छ । यसबीचमा बालबालिकाहरुको भविष्य अन्यौल भएको छ ।