२०औं हजार मार्नेहरु मन्त्री भए, रेशमजी 'चौधरी' भएकै कारण जेल कोँचिए : प्रदीप यादव

न्यूज ब्यूरो, जनकपुरधाम । समाजवादी पार्टी नेपालका सांसद प्रदीप यादवले सांसद रेशम चौधरी उपरको राज्यको व्यवहारप्रति आपत्ति जनाएका छन् ।

आईतवारको प्रतिनिधि सभाको बैठकमा सांसद यादवले टकापुर घटनामा अदालतबाट दोषी ठहर भएका सांसद चौधरी निर्दोष रहेको दावी गर्दै राज्यले अन्याय गरेको बताएका हुन् ।

उनले सांसद चौधरीलाई फलामे जंजिर लगाएर उपचार गरिएकोमा सरकारको कडा आलोचना गरे । यादवले रेशम ‘चौधरी’ भएकै कारण जेल कोँचिएको बताए । उनले भने, ‘यदी उनी चौधरी नभएको भए यतिखेर संसदमा हुन्थ्यो ।’

उनले सांसद रेशमले थारुको अधिकारका लागि आन्दोलन मात्र गरेको र कसैको ज्यान नलिएको दावी समेत गरे । उनलाई शपथ खुवाएर पनि जेलमा राखिएको भन्दै साँसद यादवले आक्रोश पोखे ।

नेता यादवले २० औँ हजार हत्या गर्नेहरु मन्त्री, प्रधानमन्त्री भएको र उनी थारु भएकै कारण जेलमा कैद गरिएको आरोप लगाए ।