धनुषाको विदेह नगरपालिकामा तालाबन्दी, अवस्था तनावग्रस्त !

न्यूज ब्यूरो, जनकपुरधाम । धनुषाको विदेह नगरपालिकाको कार्यालयमा विद्यार्थीहरुले तालाबन्दी गरेपछि अवस्था तनावग्रस्त बनेको छ ।

विदेह नगरपालिका वडा नं. ६ तिनकौरिया चोक स्थित रहेको समुदायिक विद्यालय मावि गिद्धा बेलापट्टिका विद्यार्थीहरुले दुई बुंदे माग राख्दै नगरपालिका कार्यालयको मुख्यद्धार र कार्यालयको विभिन्न सेक्सनमा तालाबन्दी गरेका छन् ।

पटक पटक नगरपालिकाका जनप्रतिनीधि र विद्यालयका प्रधानाध्यापक पवन मण्डलबीच तनाव तथा विवाद हुँदै आएकोमा शुक्रबार विद्यार्थीहरुले नै नगरपालिका कार्यालयमा तालाबन्दी गरेपछि अवस्था विग्रिएको हो ।

प्रहरी चौकी तिनकौरियाका सहायक प्रहरी नीरिक्षक (सई) संजीप पाण्डेका अनुसार विद्यार्थीहरुले मावि गिद्धाबेलापट्टिका प्रअ (हेडमास्टर) पवन मण्डललाई गरेको सरुवा बदर गर्न तथा विद्यालयको नाममा आएको रकम विद्यालयको खातामा हाल्नुपर्ने भन्दै उनीहरु तालाबन्दी गरेका हुन् ।

विद्यालयको विकासको लागि तथा विद्यार्थीहरुको छात्रवृति सहित विभिन्न शिर्षकको लागि नगरपालिकाको खातामा रकम आएपछि अहिलेसम्म विद्यालयको खातामा नदिएको कारण सेवासुविधाबाट विद्यार्थीहरु बञ्चित भएको भन्दै तत्कालै विद्यालयको खातामा रकम दिनुपर्ने भन्दै तालाबन्दी गरेको हो ।

नगरपालिका मेयर बेचन दासले प्रअ मण्डलसँगको विवादबीचमा विद्यार्थीहरु पिसिएको भन्दै विद्यार्थीहरुले आफूहरुको सेवासुविधाबाट बञ्चित गर्ने अधिकार कसैको नरहेको भन्दै नगरपालिका कार्यालयको मुख्य गेट सहित कार्यालयमा पनि तालाबन्दी गरेको हो ।

यस सन्दर्भमा नगर प्रमुख (मेयर) बेचन दासले आफू जनप्रतिनीधिहरु एक कार्यक्रममा रहेको बेला विद्यालयका केही विद्यार्थी तथा बाहिरबाट मगाइएका केही उच्छृंगल व्यक्तिहरुले नगरपालिका कार्यालयमा तालाबन्दी गरेको प्रतिक्रिया दिएका छन् ।

न्यूज ब्यूरोसँग कुराकानी गर्दै मेयर दासले भने,- "विद्यालयका प्रअ मण्डललाई कारवाही गरी हामीले नगरपालिकाभित्रै रहेको दुहबी गोबराही विद्यालयमा सरुवा गरी पठाउने निर्णय गरेका छौं । यसकै कारण प्रअ मण्डलले विभिन्न समयमा बाहिरबाट उच्छृंगल मान्छेहरुलाई बोलाएर आफू विरुद्ध नाराबाजी गर्न लगाउँछन् र आज पनि उनीहरुले त्यही गरेको छ । जब हामीहरु एक कार्यक्रममा थियौ, त्यति बेला उनीहरु गएर नगरपालिका कार्यालयमा तालाबन्दी गरेका छन् , म केही बेरमा पुगेर ताला खोलाउँछु ।"

दुई जना विद्यार्थीलाई प्रहरीले नियन्त्रणमा लिएपछि आक्रोसित विद्यार्थीहरुको भीडले प्रहरी चौकी पनि घेराउ गरेका थिए । प्रहरी चौकी घेराउ गरेपछि प्रहरीले तत्कालै पक्राउ गरिएका विद्यार्थीलाई रिहा गरेको थियो ।

प्रअ मण्डललाई अवैद्यानिक तथा स्थानीत तहको कानुन विपरित काज सरुवा गरेको भन्दै विद्यार्थी तथा उनका अभिभावकहरु विरोध गर्दै आएका छन् । नगरपालिकामा गरिएको तालाबन्दी खुलाउनको लागि विद्यार्थीहरुको माग उपर छलफल भईरहेको जनाइएको छ ।

यस सन्दर्भमा विद्यालयका प्रधानाध्यापक पवन मण्डलसँग भने सम्पर्क हुन सकेनन् ।