हेडमास्टरमा यादव आएपछि खजुरी उच्च मावि सुधारतर्फ

न्यूज ब्यूरो, जनकपुरधाम । सामुदायिक विद्यालयहरुको अवस्था जरजर तथा दयनीय भएको अवस्थामा धनुषाको एक विद्यालय सुधारोन्मुख भएको छ ।

धनुषाको जनकनन्दिनी गाउँपालिका वडा नं. ४ स्थित रहेको के एस एच एस बी उच्च माध्यमिक विद्यालयमा निमित्त प्रधानाध्यापकको रुपमा राम किशोर यादव नियुक्त भएलगत्तै विद्यालयको गतिविधिमा सुधार भएको हो । नेपाल सरकारले शिक्षामा अर्बोै बजेट लगानी गरेपनि सामुदायिक विद्यालयको शैक्षिक स्तर खस्किदै गएको अवस्थामा खजुरी उच्च माविमा नयाँ नीति नियमका साथ अध्ययन अध्ययापन सुरु गरिएको हो ।

यसअघि विद्यालयका प्रधानाध्यापक सज्जन झा भएको बेला अधिक अनुपस्थितिका कारण विद्यालयको अवस्था डगमडोल भएको थियो । आन्तरिक कारणले निर्वतमान प्र्रअ झा विद्यालयमा कम समय दिएको कारण अध्ययन अध्यापनको प्रणाली अस्तव्यस्त भएको थियो ।

प्रअमा राम किशोर यादव आएदेखि विद्यालयमा नयाँ नीति लगाएर विद्यायमा अध्ययन अध्ययापन सुरु गरिएको विद्यालयका लेखापाल मनोज कुमार यादवले जानकारी दिए । यादवका अनुसार अहिले विद्यालयमा समयमा विद्यार्थीहरु विद्यालय कम्पाउण्डभित्र छिरेपछि मात्र १२ बजे मुख्यद्धारको ताला खुलाउने भएकोले विद्यार्थीहरु भाग्ने क्रियाकलाप पूर्णत बन्द भएको हो ।

समयमा शिक्षक नआउँदा पनि अस्तव्यस्त रहेको मावि खजुरीमा अहिले प्रअ यादव आएदेखि सँचालन प्रणालीमा सुधार आएको बताइएको छ । विद्यालय सँचालन प्रणालीमा सुधार आएपछि विद्यालयका शिक्षक शिक्षिका सहित विद्यार्थीहरु समेत विद्यालयको तोकिएको समयमै आउनुपर्ने बाध्यता भएको छ जसले गर्दा विद्यालयमा अध्ययन अध्ययापन समेत सौहार्दपूर्ण तरिकाले भईरहेको हो ।

प्रअ यादव आएपछि विद्यार्थीका अभिभावकहरु समेत सन्तुष्टता जनाएको र विद्यार्थीहरु समेत सन्तुष्ट भएको प्रतिक्रिया दिएका छन् ।