डा. सिके राउत समर्थकमा फुट, असन्तुष्ट पक्ष जनतान्त्रिकसँग मिले

न्यूज ब्यूरो, जनकपुरधाम । अलगै मधेशको नारा लिएर मैदानमा उत्रेका डा. सिके राउतले मूलधारको राजनीतिमा आएलगत्तै उनीसँग उनका समर्थकहरु समेत असन्तुष्ट भएका छन् ।

डा. राउतले स्वतन्त्र मधेशको मुद्दालाई विस्थापित गरेको भन्दै उनका समर्थकहरुले पनि उनीबाट असन्तुष्ट हुँदै वैकल्पिक बाटो खोजका छन् । यसैक्रममा कुनै बेला डा. राउतको दाहिने हात मानिने जासर यादव सहितका समर्थकहरुले असन्तुष्टि जनाउँदै जनतान्त्रिक तराई मुक्ति मोर्चासँग हात मिलाएका छन् ।

तत्कालिन स्वतन्त्र मधेश गठबन्धनको नेतृत्व गरेका डा. सिके राउत खुला राजनीतिमा आएलगत्तै राउत नेतृत्वको गठबन्धन समुहका असन्तुष्ट पक्षले डा. मनोज मुक्ति नेतृत्वको जनतान्त्रिक तराई मुक्ति मोर्चासँग एकीकरण गरेको छ ।

मोर्चाका अध्यक्ष डा.मुक्ति र गठबन्धनका असन्तुष्ट समूहको नेतृत्व गरेका जासर यादवले बिहीबार एकीकरण भएको घोषणा गरेका हुन् । उनीहरुले संयुक्त विज्ञप्ति जारी गर्दै अलग मधेशको मुद्दा छाडेर छिट्टै निर्वाचन आयोगमा नयाँ पार्टी दर्ता गर्ने जनाएका छन् ।

विज्ञप्तिमा मधेशलाई सबैले धोका दिँदै आएकाले मधेश मुक्तिका लागि अघि बढ्ने प्रतिबद्धता गरेको छ । उनीहरुले जेठ २० गते निर्वाचन आयोगमा नयाँ पार्टी दर्ता गर्ने जनाएका छन् ।

यसैक्रममा डा. राउत नेतृत्वको जनमत पार्टीमा जासर यादवलाई आफूलाई चाहेको पद नभेटाएपछि उनी असन्तुष्ष्ट भएको बताइएको छ । यसअघि यादवले डा. राउत आफ्नै आसेपासे, नातागोतामा पर्नेहरुलाई मात्र पार्टीको केन्द्रीय सदस्यहरुमा राखेको भनेर समाजिक सँचाल मार्फत पनि असन्तुष्टि जनाएका थिए ।