सिरहामा एक युवतिको शंकास्पद मृत्यू, दाईजोको निहुँमा हत्याको आरोप !

न्यूज ब्यूरो, सिरहा । तराई मधेशमा एकातर्फ दजे विरुद्धको अभियान तीव्र चलिरहँदा सिरहा एक महिलालाई दाईजोकै कारण हत्या गरिएको आरोप लगाइएको छ ।

सिरहाको सिरहा नगरपालिका वडा नं. १४ खिरौना टोल बस्ने एक युवतिको रहस्यमी तरिकाले मृत्यू भएको जिल्ला प्रहरी कार्यालय सिरहाले जनाएको छ । प्रहरीका अनुसार गएराती करिब २ बजेतिर आफनै ओछयानमा सुतिकी सिरहा गोलबजार नगरपालिका वडा नं. ८ बस्ने २१ बर्षिय मनिषा कुमारी मण्डल मृत अवस्थामा भेटिएकी प्राथमिक मुचुल्का उठाइएको हो ।

सिरहाको गोलबजार नगरपालिका वडा नं. ८ बस्ने रामरेश मण्डलसँग गत फागुन १६ गते विहेको बन्धनमा बाँधिएकी मनिषालाई २ महिनामै दाईजोको निहुँमा हत्या गरिदिएको आरोप मनिषाको माईती पक्षले लगाएका छन् । मनिषाकी सासु अर्थात् रामरेशकी आमाले माईती पक्षबाट स्वीकार गरिएको थप दाईजो नल्याएको भन्दै पटक पटक यातना दिँदै आएको आरोप लगाइएको हो ।

मनिषाले माईती पक्षबाट थप दाईजो नल्याएको भन्दै उनलाई छोडनको लागि रामरेशलाई उनकी आमाले बारम्बार पहल गरिरहेकी थिईन । केटा पक्षबाट विभिन्न समयमा थप दाइजो माग गर्दै चरम यातना दिएको मनिषाको बाबु रघुनाथ मण्डलले बताए ।

जिल्ला प्रहरी कार्यालय सिरहाका प्रहरी प्रवक्ता माधवराज खरेलका अनुसार, विहिबार राती करिब २ बजे मनिषा आफ्नै ओछयानमा मृत फेला परेकी थिइन । मृत अवस्थामा उनको घर परिवारले भेटाएपछि छरछिमेकलाई गुहारेको तथा त्यसपछि प्रहरीलाई खवर गरेको थियो ।

यता, रातीको २ बजे मस्त निद्रामा सुत्ने घर परिवारका सदस्यले मनिषा मृत भएकी कसरी थाहा पायो भनेर प्रश्न उब्जिएको हो । मनिषाको ससुरा पक्षले मनिषा केही दिनदेखि विरामी परेकी थिइन र त्यसकै कारण उनको मृत्यू भएको परिवारजनलाई उदृत गर्दै जिल्ला प्रहरी कार्यालय सिरहाले जनाएको छ ।

यता, मनिषाको मृत्यू कसरी भएको भन्ने बारे पोष्टमार्टमकोे रिपोर्ट आएपछि मात्र यकिनका साथ भन्न सकिने प्रवक्ता खरेलले बताए । उनको शव पोष्टमार्टकको लागि सिरहा जिल्ला अस्पतालमा राखिएको छ ।