सिरहामा भइरहेको 'बालविवाह' बीचमै रोकियो, जन्ती बाटैबाट फिर्ता !

न्यूज ब्यूरो, सिरहा । सिरहाको मिर्चैया नगरपालिका १२ स्थित सिक्रौन गाउँमा गएराति एक बालविवाह प्रहरीले रोकाएको छ । बालविवाह भइरहेको सूचना पाएपछि प्रहरीले राति गाउँमै गएर विवाह रोकाएको हो ।

 

प्रहरी विवाहस्थलमा पुगेर रोक्का गराएपछि बेहुला र जन्ती बाटोबाटै फर्किएका छन् । विवाहको सम्पूर्ण तयारी पूरा गरेर जन्ती स्वागतका लागि बेहुली पक्ष प्रतीक्षामा रहेका बेला प्रहरीले बालविवाह रोकाएका हुन् ।

 

कलिलो उमेरमै भइरहेको बालविवाह प्रहरीले रोकाएपछि गाउँमा हलचल मचेको छ ।

 

सिरहाको लहान नगरपालिका २४ की सियाकुमारी कामैतको विवाह १५ वर्षकै कलिलो उमेरमा अभिभावकले गराउन लागेका थिए । बालिकाको विवाह अभिभावकले कलिलो उमेरमै गर्न लागेपछि लहानमा गाउँलेहरुले विवाह नगर्न दबाब दिएका थिए । कम उमेरमा विवाह नगराउन दबाब आएपछि उनको बुवा ओपिन्द्र कामैतले आफ्न्तको घर सिक्रौन पुगेर विवाह गराउन लागेका थिए ।

 

बालिकाको विवाहको लागि उमेर नै नपुगेको थाहा पाएपछि अधिकारकर्मीले प्रहरीलाई खबर गरेको थियो । प्रहरीले अधिकारकर्मी र वडाध्यक्ष सहितको समन्वयमा जन्ती आउनुअघि नै गाउँमा पुगेर विवाह रोक्का गराएको मिर्चैयाका डिएसपी सुकदेव खनालले जानकारी दिए ।

 

कलिलो उमेरमै भइरहेको बालविवाह प्रहरीले रोकाएपछि गाउँमा हलचल मचेको छ । यो कदमलाई अधिकारकर्मीहरुले सराहना गरेका छन् ।