डा. सिके राउतको जनमत पार्टीको निर्वाचन आयोगमा दर्ता प्रक्रिया पूरा

न्यूज ब्यूरो, जनकपुरधाम । डा. सिके राउत नेतृत्वको जनमत पार्टी नेपालको निर्वाचन आयोगमा दर्ता प्रक्रिया पुरा गरेको छ ।

आइतबार डा. राउतसहित केन्द्रीय सदस्यहरु दल दर्ताका लागि निर्वाचन आयोगमा निवेदन दिएपछि दर्ताको लागि प्रक्रिया पूरा गरेको जनाइएको छ । आइतबार नै केन्द्रीय सदस्यहरुको सनाखतसमेत भएको छ।

पार्टीको अध्यक्षमा डा. राउत छन् भने ३५ सदसीय केन्द्रीय समिति रहेको छ। स्वतन्त्र मधेश गठबन्धन र सरकारबीच भएको ११ बुँदे सहमतिका आधारमा डा।राउतको नेतृत्वमा जनमत पार्टी गठन भएको हो।

जनमत पार्टीको मुख्य राजनीतिक सिद्धान्त जनसंप्रभुत्ता, लोकतन्त्र, समाजिक न्याय र समाजवाद रहेको छ। पार्टीले निर्वाचन आयोगमा बुझाएको विधानमा नेपालको संविधानले प्रदान गरेको नेपालको स्वतन्त्रता, सार्वभौमिकता, भौगोलिक अखण्डता, राष्ट्रिय एकता, स्वाधीनता र स्वाभिमानलाई स्वीकार गरिएको छ।

जनमत पार्टीका केन्दीय सदस्य जेपी साहले पार्टी दर्ताको लागि निर्वाचन आयोगमा चाहिने सबै प्रक्रियाहरु पूरा गरेको जानकारी समाजिक सञ्जाल मार्फत दिएका छन् ।