प्रदेश सरकारले आफ्नै सिडिओ राख्नै पाउँदैन : गृहमन्त्री बादल

न्यूज ब्यूरो, जनकपुरधाम । नेपाल सरकारका गृहमन्त्री राम बहादुर थापा (बादल) ले प्रदेश सरकारले आफ्नै सिडिओ राख्नै नपाउने बताएका छन् ।

प्रदेश नं. २ का मुख्यमन्त्रीले आफ्नै सिडिओ राख्ने प्रक्रिया अन्तिम चरणमा ल्याएको बेला गृहमन्त्री बादलले सो कुरा बताएका हुन् । प्रदेश सरकारले आफ्नै सिडिओ नियुक्त गर्ने प्रक्रियाको अन्तिम चरणमा रहेको बेला गृहमन्त्री थापाले सिडिओ राख्ने अधिकार मात्र संघीय सरकारको भएको भन्दै दोहोरो सिडिओको प्रावधान नै नरहेको औल्याए ।

नागरिकताको सबालमा बोल्दै गृहमन्त्री थापाले नागरिकता सम्बन्धी कैयौँ समस्यालाई समाधान गरिएको दाबी गर्दै सर्वोच्च अदालतको गत वि.स. २०५४ सालमा नागरिकता पाएका नागरिकको हकमा गरेको फैसलालाई मान्दै त्यही अनुरुप गृहमन्त्रालयले प्रक्रिया र काम कारवाही अघि बढाउने बताए ।

संघीय सरकारकै गृहमन्त्रालयद्धारा सातै प्रदेशमा गरिने सुरक्षा गोष्ठीमध्ये शनिबार जनकपुरमा आयोजना गरिएको सो प्रदेशस्तरीय गोष्ठी कार्यक्रममा बोल्दै गृहमन्त्री थापाले देशको सुरक्षा अवस्था थप प्रगाढ बनाउको लागि केन्द्र सरकारको ध्यान केन्द्रीत भएको बताए ।

सो कार्यक्रममा उनले भने , - "संघीय सरकारले एक वर्षको अवधिमा सरकारले समृद्धिको निम्ति आवश्यक संरचाना र कानुन निर्माण गरेको गरेको स्मरण गराउन चाहन्छु । भर्खरै सम्पन्न लगानी सम्मेलनले नेपालमा नेपालमा लगानी प्रवद्र्धनको लागि मह्तत्वपुर्ण आधार खडा गरेको कुरा कसैबाट लुकेको छैन । यो एक वर्ष मुलुकमा शुसासन र शान्ति सुरक्षा र अखण्डतालाई सुदृढ गर्ने सन्दर्भमा पनि महत्ववपुर्ण उपलब्धि हासिल भएको छ ।"

यता, सिडिओ नियुक्तीको सम्बन्धमा गृहमन्त्री थापाको कथनपछि प्रदेश सरकारले अर्को कुन कदम उठाउने बारे अन्यौल रहेको छ । यसअघि मुख्यमन्त्री राउतले आफ्नै सिडिओ, आफ्नै प्रहरी, आफ्नै कर्मचारी भर्ना गर्ने जीकिर गर्दै आएको बेला गृहमन्त्रीको कथनले पुनः संघीयता उपर प्रश्न खडा गरिएको देखिएको छ ।