नगरस्तरीय कक्षा ८ को परीक्षाफल प्रकाशनमा पनि कान्छो मेयर अग्र

न्यूज ब्यूरो, जनकपुरधाम । नगरस्तरीय परीक्षाको परीक्षाफल प्रकाशन गर्नमा पनि धनुषाको शहिदनगर नगरपालिका प्रदेशमै प्रथम भएका छन् ।

धनुषाको शहिदनगर नगरपालिकाले प्रदेश नं. २ मै सबभन्दा पहिले नगरस्तरीय परीक्षाको परीक्षाफल प्रकाशित गरेर कार्य प्रगतिको अर्को सबुत दिएका छन् । नगरपालिकाले आधारभूत तहको कक्षा ८ को परीक्षाफल सार्वजनिक गर्दै प्रदेशभरिमै सबभन्दा पहिले प्रकाशन गरेको प्रति कृतज्ञता प्रकट गरे ।

शुक्रबार बसेको शहिदनगर स्तरीय शिक्षा समिति तथा नगर शिक्षा समितिको बैठकले २०७५ कक्षा ८ को परीक्षा नतिजा प्रकाशन गर्ने निर्णय अनुसार नगर प्रमुख उदय कुमार बरबरियाले नतिजालाई सार्वजनिक गरेका हुन् । नगरपालिकाको गठित शिक्षा समितिले कार्य कुशलता प्रदर्शन गरेको भन्दै मेयर बरबरियाले शिक्षा समितिलाई धन्यवाद ज्ञापन गरे ।

परीक्षा फल प्रकाशित गर्दै कान्छो मेयर बरबरियाले परीक्षामा सहयोग गर्ने सम्पूर्णलाई धन्यबाद ज्ञापन गर्दै नयाँ शैक्षिक सत्र २०७६ वैशाख ३ गतेदेखि हुने विद्यालय भर्ना अभियानमा सहयोग गर्न आग्रह गरे ।

नयाँ शैक्षिक सत्रबाट समुदायिक विद्यालयहरुको पुरानो पहिचानलाई उजागर गर्दै नगरका गरिब, निमुखा, अल्पसँख्यक, दलित समुदायका बालबालिकाहरुलाई १०० प्रतिशत विद्यालय पहुँचको अवस्था सृजना गर्ने दाबी गरे । उनले कार्यको सुरुवात मात्रै भएको जनाउँदै शिक्षा क्षेत्रलाई पूर्णत बलियो बनाउने प्रतिवद्धता समेत जाहेर गरे ।