शहिदनगरबाट राष्ट्रसेवक कर्मचारीको नयाँ रेकर्ड कायम हुन्छ : मेयर बरबरिया

न्यूज ब्यूरो, जनकपुरधाम । धनुषाको शहिदनगर नगरपालिकाका मेयर उदय कुमार बरबरिया (यादव) ले नगरपालिकाबाट दक्ष जनशक्ति उत्पादनको लागि निःशुल्क लोकसेवा तयारी कक्षा सँचालनमा ल्याएको बताएका छन् ।

बुधबार एक कार्यक्रमबीच निःशूल्क लोक सेवा आयोगको तयारी कक्षा सँचालनको उद्घाटन गर्दै मेयर बरबरियाले नगरलाई समृद्ध बनाउनको लागि चाहिने दक्ष जनशक्ति उत्पादनको लागि प्रत्येक वडाबाट युवाहरुलाई सहभागी गराउने बताए । उनले भने, हाम्रो नगरपालिकाबाट राष्ट्रसेवक कर्मचारीको तथ्याँकमा नयाँ रेकर्ड कायम हुन्छ ।

प्रत्येक वडाबाट ११ ११ जना युवायुवतिहरुलाई सहभागी गराईएको जनाउँदै मेयर बरबरियाले नगर समृद्धिको सूचकको रुपमा लोकसेवा आयोग तयारीको लागि निःशूल्क कक्षा सँचालन गरिएको जनाए । सो कार्यक्रममा सहभागीहरुले मेयर बरबरियाले आफूहरुको लागि स्थानीय स्तरमै लोकसेवा तयारीको लागि व्यवस्था मिलाएकोप्रति कृज्ञता व्यक्त गरे ।

"लोकसेवा तयारीको लागि जनकपुर लगायत अन्य ठुल ठुला शहरमा जाने बाध्यता थियो । मोटो रकम तिरेर भएपनि लोकसेवा तयारीको लागि घर नै छाडने अवस्था थियो, आज मेयर साहबले घरमै बसी लोकसेवाको तयारी गर्न सकिने जस्तो वातावरण निर्माण गरिदिनुभएको छ । यो भन्दा खुसीको कुरा अरु के हुन सक्छ । हामी ईच्छुक विद्यार्थीहरुको लागि उहाँको काम सराहनीय छ । आगामी दिनमा पनि मेयर साहबको यस्ता कार्यहरुप्रति चासो कायम रहे नगर वास्वतमै समृद्धि यसैपालीमा हेर्न सक्नेछ ।"- एक सहभागीले भने ।

शहिदनगर नगरपालिकाको आर्थिक सहयोग तथा मानव विकास केन्द्रको सँयुक्त सहयोगमा नगरभित्रका विद्यार्थीहरुको लागि निःशूल्क लोकसेवा तयारी कक्षा तयारी सुरु गरेको हो । मेयर बरबरियाकै प्रमुख आतिथ्यमा सुरक्षित आवास निर्माण मेसन तालिम समेत सुरु गरिएको हो । यसको लागि पनि प्रत्येक वडाबाट ११ ११ जना सहभागी छनौट गरिएको हो ।

स्थानीय युवाहरुलाई बेरोजगारीको रेखामुनीबाट रोजगारीको रेखामुनी ल्याउन यस्ता कार्यहरुलाई प्रश्रय दिएको मेयर बरबरियाले न्यूज ब्यूरोसँग भने । सो उदघाटन कार्यक्रममा नगरकी उपमेयर शिला देवी कापर, वडाध्यक्ष रामदेव मरिक, राम एकवाल मण्डल, प्रमुख प्रशासकीयअधिकृत नन्द कुमार झा, लेखापाल लोक बहादुर नेपाली, कंप्यूटर अपरेटर बिशुन यादव, शिक्षक कृष्णा भिन्भार यादव लगायत विद्यार्थी, बुद्धिजीवीहरुको उपस्थिति रहेको थियो ।