विनाशकारी हुरी : यो ठाउँमा अहिलेसम्म पुगेनन राहतकर्मी, भोक र पीडाले छटपटाउँदै घाईतेहरु !

न्यूज ब्यूरो, जनकपुरधाम । आईतबार साँझ आएको भिषण हावाबतासका कारण अहिलेसम्म २७ जनाको ज्यान गएको पुष्टि प्रदेश सरकारले गरेको छ ।

सो घटनामा अहिलेसम्म ५०० बढी सर्वसाधारण घाईते भएका छन् । यसैक्रममा बाराको पडसौनी गाउँपालिकामा हावाहुरीले गरेको विनासकारी वितण्डाले १ जनाको ज्यान गएको छ भने ५० बढी घाईते भएका छन् । सो गाउँपालिका बाराको विकट क्षेत्रझै भएकोले त्यहाँसम्म अहिलेसम्म कुनै प्रकारको राहत समेत नपुगेको स्थानीय जेपी साहले न्यूज ब्यूरोलाई जानकारी दिएका छन् ।

साँझ आएको विनाशकारी हावाहुरीमा परेर एक जनाको ज्यान गएको छ भने घाईतेहरु पीडाले छटपटाईरहेको बुझिएको छ । उनीहरुलाई आवास र गाँसको खाँचो भएको भन्दै उनीहरुलाई आकस्मिक सहयोगको लागि अपिल गरिएको छ । विनाशकारी हावाहुरीले विजुलीको पोलहरु समेत ढलेको कारण विजुली नभएर मोबाईलहरु समेत बन्द भएको अवस्थामा राहतकर्मीहरुको प्रतिक्षामा बसेर दिन बिताएका छन् ।

बाराको हावाहुरी प्रभावित क्षेत्रमा मन्त्री, राजनीतिकर्मी, अभियन्ता, समाजसेवी, राहतकर्मीहरु पुगेपनि बाराको परसौनी गाउँपालिका वडा नं. ४ मा भने अहिलेसम्म राहतकर्मीहरुको पहुँच नभएको भन्दै उनीहरुलाई उठीवास भएको छ । विनाशकारी हावाहुरीका कारण २ सय ५० बढी घर भत्किएको जानकारी साहले दिएका छन् ।