मधेश विरोधी भनिने जनकपुरका 'दत्त' बने मधेशी आयोगका अध्यक्ष

न्यूज ब्यूरो, जनकपुरधाम । मधेशी आयोगको अध्यक्षमा जनकपुरका डा विजय दत्तलाई नियुक्त गरिएको छ ।

जनक हजारी विद्यापिठमा उपप्राध्यापक समेत रहेका दत्त मधेश सम्बन्धी कुनै विश्वासिलो काम नगरेको देखिएपनि उनलाई मधेशी आयोगमा नियुक्त गरिएपछि समाजिक सञ्जालमा विरोध समेत खेप्नुपरेको छ । भुमिजा मानव अधिकार संघ गठन गरी तराईमा मानवअधिकारको क्षेत्रमा कार्य गरेका दत्त मधेश आन्दोलनपछि तत्कालिन नेकपा एमालेमा सकृय भएका थिए ।

पछिल्लो समयमा काठमाण्डुमा रहेर कट्टर मधेश विरोधीको छवि बनाउन सफल भएपछि सरकारबाट पुरस्कृत भएका हुन् ।नेकपामा उनी महासचिव समेत रहेका रक्षा मन्त्री ईश्वर पोखरेलको माध्यमबाट प्रधानमन्त्री केपी ओली सम्म पहुँच बनाएकै कारण उनलाई मधेशी आयोगमा नियुक्त गरिएको बुझिएको छ ।

गत माघमा प्रधानमन्त्री ओलीकै अध्यक्षतामा बसेको बैठकबाट मधेशी आयोगसहित संवैधानिक परिषद्ले पाँच संवैधानिक आयोगमा अध्यक्ष पदका लागि नाम सिफारिश गरेको बेला मधेशी आयोगको लागि दत्तको नाम सिफारिस गरिएको थियो । राष्ट्रिय प्राकृतिक स्रोत तथा वित्त आयोगको अध्यक्षमा पर्वतका बालानन्द पौडेल, राष्ट्रिय समावेशी आयोगका अध्यक्षमा प्यूठानका शान्तराज सुवेदीको नाम सिफारिस गरिएको छ ।

त्यसैगरी, परिषद्ले थारू आयोगको अध्यक्षमा बर्दियाका विष्णुप्रसाद चौधरी र मुस्लिम आयोगको अध्यक्षमा काठमाडौँका समिम अन्सारीको नाम सिफारिश गरेको बैठकपछि राष्ट्रिय सभाका अध्यक्ष गणेशप्रसाद तिमिल्सिनाले जनाएका थिए । नेपालको संविधानअनुसार संवैधानिक परिषद्को सिफारिशमा राष्ट्रपति विद्यादेवी भण्डारीबाट संवैधानिक आयोगका अध्यक्षको पद तथा गोपनीयताको शपथ गरिने व्यवस्था छ ।

संविधान जारी भएको तीन वर्ष वितिसक्दा आयोगलाई पूर्णता दिन थालिएको छ । यस अघि आयोगमा कर्मचारीहरु मात्र रहेका थिए ।कर्मचारीहरु रहेपनि आयोगले काम गर्न सकेको थिएन् । संवैधानिक समितिले आयोगका अध्यक्षमा सिफारिस गरेपछि आयोगले चाँडै पूर्णता पाउँदै मधेशी आयोगको लागि दत्तले विहिबार सपथ खाएका छन् ।

पाँचवटै आयोगका अध्यक्षहरु आ–आफ्नो क्षेत्रमा ठूलो ख्याती कमाएका होईनन् । सर्वाधिक महत्वपूर्ण र चर्चित मानिएको मधेशी आयोगका अध्यक्षमा सिफारिस भएका दत्त नेपाली काँग्रेस हुँदै नेकपामा छिरेका थिए । जनकपुरमा उनलाई मधेश विरोधी भनेर भन्दै आएको छ ।

मधेशको नाम नै सुन्न नचाहने र कहिले पनि मधेश शब्द नबोल्ने दत्त मधेशी आयोगको अध्यक्ष भएपछि समाजिक सँजालमा उनको चर्को विरोध पनि युवाहरुले गरेको देखिएको छ ।