जनकपुरको जानकी मन्दिरमा पूजा गर्दै पूर्वराजा शाहले भने, -'देशमा शान्ति छैन'

न्यूज ब्यूरो, जनकपुरधाम । पूर्व श्री ५ महाराजधिराज राजा ज्ञानेन्द्र विर विक्रम शाहदेवले नेपालमा शान्ति नभएको जिकिर गरेका छन् ।

जनकपुर केन्द्र बनाएर मधेशको धार्मिक यात्रामा रहेका पूर्वराजा ज्ञानेन्द्र साहले जानकी मन्दिरमा पुजाअर्चना गर्दै देश प्रगति उन्मुख भएपनि शान्ति नभएकोले प्रगतिको बाधक बनेको बताए । पूर्व राजा शाहले करिब दश मिनेटसम्म जानकी मन्दिरमा पूजाआजा गरेपछि ज्ञानेन्द्रले आफू मुलुकमा शान्ति छाओस भन्ने ईच्छाएको बताए ।

‘सबै नेपाली जहाँ बसेपनि सुख शान्तिले बसोस, यही हाम्रो कामना हो, उनले भने, ‘अहिलेको समय देशमा प्रगति हुन शान्ति छैन । शान्ति चाहिन्छ त्यसैले सबैलाई सन्देश दिनुस् ।’ उनले भने । मुलुक वास्तवमै अशान्त भइसकेको हो भन्ने प्रश्नमा पुर्वराजा शाहले जनताको मनोबल परिस्थती कस्तो रहेको उनीहरुसँग नै सोध्न आग्रह गरे ।

एक अर्को प्रसंगमा बोल्दै पूर्वराजा शाहले तराई मधेश नेपालकै एउटा अभिन्न र उर्वर भूमि भएको भन्दै मधेशलाई मधेश मात्र होईन तराई मधेश भन्न पनि आग्रह गरे । जानकी मन्दिरमा पुजा अर्चना पछि उनी विवाहमण्डप पुगेका शाहले यसअघि बिहीबार सर्लाहीको मलंगवामा दुर्गा मन्दिरमा पूजापाठ गरेका थिए ।

पूर्वराजा ज्ञानेन्द्रका स्वकीय सचिव (पिए) सागर तिमिल्सनाले जनाए अनुसार शिनबार विहानै जनकपुरबाटै उदयपुरको गाइघाट पुगेर राधाकृष्ण मन्दिरमा पूजापाठ गर्ने कार्यक्रम रहेको छ । गाइघाटबाट पुनः जनकपुर फर्केर ३ चैतमा उनको सप्तरीको सखडा भगवतीमा पूजाअर्चना गर्ने कार्यक्रम छ ।

विभित्र मठमन्दिर पुगेर पूजापाठ गर्नुका साथै आफ्ना समर्थकहरुसँग भेटघाट गर्ने कार्यक्रम रहेको छ । पूर्वराजा शाहको यसअघि २२ फागुनबाट मधेश भ्रमण गर्ने कार्यक्रम रहेपनि आमा रत्नराज्य लक्ष्मी शाहको स्वास्थ्यमा समस्या आएपछि स्थगित भएको थियो ।

जानकी मन्दिरमा पुगेपछि राप्रपा नेपाल, राप्रपा संयूक्त, शिव सेना, राजपा लोकतान्त्रिक लगायतका नेता, कार्यकर्ता तथा समर्थकहरुले ‘राजा आऊ, देश बचाऊ’ भन्ने नारा लगाएका थिए । उनलाई स्वागत गर्न सहभागिहरु फुलमाला र राजारानीको फोटो समेत लिएर स्वागत गरेका थिए । उनी शनिवार उदयपुर पुगेर पुनः जनकपुर फर्केपछि आईतवार काठमाडौं जाने कार्यक्रम रहेको सचिव फणी पाठकले जनाएको छ ।

वि.स. २०५८ साल जेठ १९ गते भएको दरबारहत्या काण्डपछि नेपालमा अशान्ती छाएको हो ।

जनतापाटीको सहयोगमा