मलेठ पुगेर मधेशवादी नेताहरुले भने,-'एकजुट होऔं, नत्र नेपाल सरकारले सबै मधेशीलाई थुन्छ !'

न्यूज ब्यूरो, सप्तरी । राजपा सांसद रेशम चौधरीलाई जन्मकैदको फैसलापछि मधेश तातेको छ । योसँगै मधेश र समग्र नेपालको राजनीतिले नयाँ मोड लिएको छ ।

सांसद चौधरीलाई जन्मकैदपछि राजपाले सरकारलाई दिएको समर्थन फिर्ता लिएको भोलिपल्टै आन्दोलनका लागि एकजुट हुन आह्वान गरेको छ ।

एकजुट भएर आवाज बुलन्द नबनाए नेपाल सरकारले सबै मधेशीहरुलाई थुनेर राज गर्ने उनीहरूको दावी छ । जिल्ला अदालत कैलालीले टीकापुर घटनामा रेशम चौधरीसहित ११ जनालाई जन्मकैदको सजाय सुनाए लगतै राजपाले समर्थन फिर्ताको निर्णय लिएको हो ।

त्यसको भोलिपल्ट आज सप्तरीको मलेठमा मारिएका पाँच जनाको दोश्रो पुण्यतिथिको अवसरमा बिहीबार आयोजित श्रद्वाञ्जली सभामा राजपा शीर्ष नेताहरु सहभागी भएका थिए ।

संघीय फोरमका अध्यक्ष उपेन्द्र यादव भने देखिएनन् । यद्यपि प्रमुख २ का मुख्यमन्त्री लालबाबु राउत संघीय फोरमका लगायतका नेताहरु भने सहभागी थिए ।

श्रद्धाञ्जली सभामा राजपा नेपालका अध्यक्ष मण्डली संयोजक महेन्द्र राय यादवले मधेसमा ‘जय मधेस’ मात्र भनेर राष्ट्रिय मुद्दाको सम्बोधन नहुने बताए ।

संघीय लोकतान्त्रिक गणतन्त्र, धर्मनिरपेक्षता, सामुनापातिक समावेशी मधेश आन्दोलनको उपलब्धी भएपनि वर्तमान सरकार यसको पक्षमा नरहेको उनले बताए । आफ्नो पार्टीले मधेसको जनतासँगै शहिद परिवारसँग समेत बसेर छलफल गर्ने र त्यसआधारमा राजपा अगाडि बढ्ने उनले बताएका छन् ।

राजपा नेता राजेन्द्र महतोले सरकारलाई खसवादी र नश्लवादी भएको टिप्पणी गरे । मधेसी, थारु, जनजातिहरु सबै मिलेर एउटै मोर्चा बनाएर अगाडि बढ्न सके सरकारमा सहभागी भएकाहरुले भाग्ने बाटो पनि नपायउने उनले बताए ।

पहिचानवादीहरु छुट्टाछुट्टै नभई एकजुट हुनुपर्ने अहिलेको आवश्यक्ता भएको भन्दै महतोले यसो नगरिए सरकारले विभिन्न बहानामा सबैलाई थुन्ने दाबी गरे ।

रेशम चाौधरीलाई जन्मकैद सुनाइएको स्मरण गर्दै उनले भने, ‘के रेशम चौधरी मात्र आन्दोलनाकारी हुन्, जसले प्रहरीको हत्या गरे ? के यो भन्दा पहिला आन्दोलनमा प्रहरीको मृत्यु भएको छैन ? छ भने तिनीहरुलाई किन कारबाही भएन ?’

कार्यक्रममा बोल्दै प्रदेश २ का मुख्य मन्त्री लालबाबु राउतले केन्द्रीय सरकारले संविधान विपरित काम गरेर प्रदेश सरकारको आफ्नै प्रहरी हुन नदिन खोजेको बताए । उनको प्रश्न छ, ‘प्रहरी बिना प्रदेश सरकार संचालन गर्न सकिन्छ ?’

संघीय सरकारको नकारात्मक सोचले गर्दा प्रदेश सरकार अगाडि बढ्न नसकेको आरोप लगाउँदै मुख्यमन्त्री राउतले भने, ‘प्रदेश सरकार बलियो भएमा केन्द्रीय सरकार कमजोर हुने सोचबाट केन्द्रीय सरकारमा सहभागी भएकाहरु ग्रसित छन् ।’

प्रदेश सरकार गठन पश्चात प्रदेशभित्र आफ्नो शासन र आफ्नो प्रशासन बनेपछि मात्र प्रदेश सरकारको महत्व हुने उनले बताए ।