हुलाकी सडकमा परी विस्थापित भएका जनतालाई मुआब्जा दिनैपर्छ : नेता अरगरिया

न्यूज ब्यूरो, जनकपुरधाम । धनुषा निर्वाचन क्षेत्र नं. २ का संघीय साँसद उमा शंकर अरगरियाले हुलाकी सडक विस्तारको क्रममा विस्थापित भएका जनताहरुलाई सरकारले मुआब्जा दिनुपर्ने जोडदार माग उठाएका छन् ।

बुधबार संघीय सँसदमा बोल्दै प्रतिनीधि सभा सदस्य अरगरियाले हुलाकी सडक विस्तारको क्रममा हजारौ घर भत्केर हजारौ गरिब परिवार विस्थापित भएको भन्दै उनीहरुलाई पुर्नवासको लागि सरकारले मुआब्जा दिनुपर्ने माग उठाएका छन् ।

यसपाली नेपाली भाषामै आफ्नो माग राख्दै नेता अरगरियाले भने,- "धनुषाको कपिलेश्वरदेखि कलमा नदिसम्म हजारौ घर परिवार विस्थापित भएको अवस्था छ । उनीहरुलाई सुरक्षित वासको व्यवस्था नगरेरै सरकारले उनीहरुलाई मात्र विस्थापित गरेर छाडेको छ उनीहरु विच्चलीमा परेका छन् । म सरकारसँग आग्रह गर्छु की हुलाकी सडकमा परेर भत्केका परिवारलाई पुनः स्थापित गर्नुपर्छ, उनीहरुलाई उचीत मुआब्जाको व्यवस्था गर्नुपर्छ ।"

धनुषाको कपिलेश्वर, भोईल, देउरी, परवाहा, कपटौल, औरही, योगियारा, बेलापट्टी, तिनकौरिया, एकराही, सराबे, माचि, लगमा, सघारासम्मको हुलाकी सडक विस्तारको क्रममा सडकको दुवै तर्फ गरी हजारौ आम सर्वसाधारणको घर पूर्णत विस्थापित भएको अवस्थालाई दर्साउँदै तत्कालै मुआब्जा व्यवस्था गर्न आग्रह गरे ।

हुलाकी राजमार्ग विस्तारको क्रममा केही मात्र जमिन ज्याथा भएका गरिब परिवार पूर्ण रुपले नै विस्थापित भएको अवस्था छ भने उक्त खण्डमा धनुषाको देउरी परवाहा र औरहीवासीले मुआब्जाको माग गर्दै सडक बनाउन भने दिएका छैनन् ।

हुलाकी सडकको गुणस्तरियाको बारेमा बोल्दै नेता अरगरियाले सडकका ठेकेदार एवम् वर्तमान प्रदेश नं. २ का प्रदेश साँसद किशोरी साहले कन्टर्याक्टरलाई दिएको जिम्मा ईमान्दारितापूर्वक बहन नगरेकोप्रति सरकारलाई ध्यानाकर्षा गराए । हुलाकी सडक निर्माणको क्रममा क्वालीटि कन्ट्रोल नभएको आरोप लगाउँदै गुणस्तरियहिन कार्य भईरहेकोप्रति सरकारलाई ध्यानाकर्षण गराए ।

यसका साथै राहत शिक्षकहरुको बारेमा बोल्दै उनले सरकारले गरेको शक्ति प्रदर्शन र बल प्रयोग उपर खेद प्रकट गदैै राहत शिक्षकको माग पूरा गर्नुपर्ने धारणा समेत राखे । शिक्षकहरुले आन्दोलन गर्दा सरकारले देखाएको व्यवहारको विरोध गरे ।