नेता निधिले सोमनाथ महादेवमा 'रुद्राभिषेक' गर्ने

न्यूज ब्यूरो, जनकपुरधाम । धनुषाको नगराईनमा सोमनाथ महादेव मन्दिर निर्माण गरिएको छ ।

आउँदो फागुन २० गते महाशिवरात्रीका दिन नव निर्मित मन्दिरलाई नेपाली काँग्रेसका उपसभापति विमलेन्द्र निधिले उद्घाटन गर्ने कार्यक्रम रहेको जनाइएको छ । धनुषाको नगराईन नगरपालिका वडा नं. ६ लगमा बस्ने बुवा महेन्द्र झा एवम् आमा त्रिवेणी देवी झामा समर्पित भएर उनका छोरा बब्लु कुमार झाले सोमनाथ महादेव मन्दिरको निर्माण गरेका छन् ।

उक्त नव निर्मित सोमनाथ मन्दिरलाई नेता निधिको हातबाट उद्घाटन गर्ने कार्यक्रम रहेको श्री सोमनाथ महादेव पूजा समिति नगराईनले जनाएको छ । समितिका अनुसार, फागुन २० गते सोमबार विहान ६ः३० बजे शान्ति कलश यात्रा समेत निकालिने भएको छ ।

यस्तै, त्यही दिन विहान ११ बजे मन्दिरमा निर्मित महादेवमा रुद्र अभिषेक एवम् प्राण प्रतिष्ठा गर्ने भएको छ भने साँझ ६ बजे आरती कार्यक्रम रहेको समितिले जनाएको छ । रात्री ८ बजेदेखि जागरण कार्यक्रमको आयोजना गरिएको छ भने फागुन २१ गते विहान ६ बजेदेखि प्रसाद वितरण कार्यक्रम तय गरिएको छ ।

नेता निधि धनुषा निर्वाचन क्षेत्र नं. ३ का प्रतिनीधिसभा सदस्यका प्रत्यासी र पूर्व गृहमन्त्री हुन् ।