मधेश सरकारले मुलुकमा संघीयता ल्याएको छ : मन्त्री मण्डल

जनकपुरधाम, २६ माघ । मधेशका उद्योग, पर्यटन, वन तथा वातावरण राज्य मन्त्री सुरेश मण्डलले प्रदेश नं. २ सरकारले मुलुकमा संघीयता ल्याएको बताएका छन् ।

देशमा ६ वटा संघीय सरकार एउटै पार्टीको रहेको तर प्रदेश नं. २ मधेशवादी दलको सरकार भएपछि केन्द्रले समेत सौताको व्यवहार देखाईरहेको आरोप लगाए । राजपा नेपालले शुक्रवार धनुषाको औरही , कपटौल र देउरीमा आयोजना गरेको कार्यकर्ता भेटघाटलाई सम्बोधन गर्दै उनले प्रदेश नं. २ लाई असफल बनाउन केन्द्रबाट कर्मचारी निर्देशित भई आउने गरेको र प्रदेश सरकारलाई सहयोगको साटो असहयोग गर्ने गरेको बताए ।

प्रदेश २ मा खस्किएको शिक्षाको स्तरलाई माथि उठाउन सबैले सहयोग गर्नुपर्ने उनले बताए । सरकारको शिक्षा नीतिमा भाषागत विभेद रहेको उनको आरोप थियो । ‘अब लोकसेवा आयोगदेखि पठनपाठन समेत मातृभाषामा गराउन प्रदेश सरकार प्रतिवद्ध छ,’ उनले भने हाम्रो मातृभाषा मैथिली तर परिक्षा नेपाली भाषामा दिनुपर्ने बाध्यताका कारण समेत मधेशका विद्यार्थीहरु पछाडि परेका छन ।

कार्यक्रममा राजपा नेपालका केन्द्रिय सदस्य चन्द्र नारायण मंडलले राजपा नेपालले गरेको आन्दोलनको उपलब्धि आज नेकपा , कांग्रेस लगायतका राजनीतिक दलहरुमा लागेका मधेशीहरुले भेटाएको बताए ।

उनले मधेशको पक्षमा वकालत गर्ने एक मात्र राजपा नेपाल रहेकोले अबको निर्वाचनमा राजपा नेपाललाई सर्वाधिक मत दिई बिजयी बनाउन आग्रह गरेका छन । कार्यक्रममा राजपा नेपालका नेता प्रमोद कुमार यादव , जयकृष्ण मंडल , किरण यादव सहितका नेताहरुको उपस्थिति रहेको थियो ।