महायज्ञ स्थलको निरीक्षण गर्दै मुख्यमन्त्री राउतले भने, - 'हरेक प्रकारको सहयोग गर्छौं'

जनकपुरधाम, २३ माघ । धनुषामा मुलुकमै प्रथम हुन लागेको महायज्ञ स्थलको मधेशका मुख्यमन्त्री लालबाबु राउतले निरीक्षण गर्नुभएको छ । धनुषाको लक्ष्मिनियाँ गाउँपालिका वडा नं. १ मा माघ २९ गतेदेखी सुरु हुन लागेको महायज्ञ स्थलको मुख्यमन्त्री राउतले आज निरीक्षण गर्नुभएको हो ।

महायज्ञ स्थलको निरीक्षण पछि उहाँले मुलुकमै पहिलो चोटी हुन लागेको महायज्ञले मानव कल्याणका साथै धार्मिक र सांस्कृतिक महत्वलाई उजागर गरिने विश्वास व्यक्त गर्नुभयो ।

उहाँले महायज्ञको व्यवस्थापनमा सरकारबाट हुन सक्ने हरेक प्रकारको सहयोग प्राप्त हुने प्रतिबद्धता जनाउनुभयो । मुख्यमन्त्री राउत मुस्लिम समुदायबाट भएपनि हिन्दु धर्मप्रति देखाएको सद्भाव र आस्था सम्मानजनक मानिन्छ ।

हिन्दु धर्मप्रति महायज्ञमा शेष नागको पेट भित्र एक हजार आठ मूर्तिको निर्माण गरी रामायण र कृष्णलिलालाई प्रदर्शन गरिएको छ ।

२१ दिनसम्म चल्ने महायज्ञमा राम नाम सकिर्तन, कोटीहोम लगायतको कार्यक्रम राखिएको आयोजकले जनाएको छ ।