मधेश पसेर प्रम ओली भने, -'मेचीदेखि महाकालीसम्म रेल गुडेपछि सबै छक्क पर्नेछ'

सिरहा, १९ माघ । प्रधानमन्त्री केपी शर्मा आलीले चाँडै नै मेचीदेखि महाकालीसम्म रेल गुड्ने बताएका छन् । शहिद हेमनारायण यादवको १५औं स्मृत्तिसभा कार्यक्रमलाई सम्बोधन गर्दै प्रम ओलीले यस्तो बताएका हुन् ।

प्रम ओलीले त्यसका लागि सबै प्राविधिक काम भइरहेको बताए । उनले भने, ‘सरकार तीव्र गतिमा सबैकाम थालिसकेको छ, मेचीदेखि महाकालीसम्म चाँडै रेल गुडाउँछौं, हामिले रेल गुडाएको देखेपछि हाम्रो कुरालाई मजाक उडाउनेहरु छक्क पर्नेछ, तर अलिक धैर्य गर्नुहोस् ।’

उनले विदेश आफ्नो लागि नभई यही सबका लागि र जनताको हितका लागि घुमेको बताए । अरु–अरु पार्टीका सरकारले देशको ढुकुटी रितो पारेको आरोप लगाउँदै उनले यस सरकारलाई काम गर्न अलिक असहज भइरहेको सुनाए । उनले यावत समस्याका समाधानका लागि सरकार अग्रसर रहेको बताउँदै गरेका सबै प्रतिवद्धता विस्तारै पूरा हुँदै जाने बताए । प्रम आलीले मुलुक हरेक दिन आधुनिकता तर्फ अगाडि बढिरहेको जोडे ।

सरकारले गरेका कुनै प्रतिवद्धाता हावा कुरा नभएको बताउँदै उनले जनताका सपना पूरा गर्न सरकार अठोटका साथ लागिपरेको बताए ।

सो कार्यक्रममा सरकारका भौतिक पूर्वाधार तथा यातायात मन्त्री रघुविर महासेठले आउने चुनाव सम्म मेची देखि महाकालीसम्मको हुलाकी राजमार्ग यही सरकारले बनाउने दाबी गरेका छन् । शनिबार प्रदेश नं. २ को सिरहा जिल्लाको सिरहा स्थित च. माविको छात्रावासलाई शिलान्यास तथा शहिद हेमनारायण यादवको १५ औँ स्मृति सभालाई सम्बोधन गर्दै महासेठले मेची देखि महाकाली सम्मको हुलाकी राजमार्ग आफ्नै पालमा चुनाव अघि नै बनाउने जीकिर गरे ।

शहिद यादवको शालिकमा माल्यार्पण गर्दै प्रम ओलीले २०६१ सालमा यादवको हत्या सेनाले गरेको आरोप लगाए । पूर्व साँसद एवम् तत्कालिन नेकपा एमालेका नेता रहेका यादवको हत्यापछि सिरहामा एमालेले आन्दोलन चर्काएको स्मरण समेत गराए ।