राराब क्यामपसका विद्यार्थीहरुको माग पूरा हुने

जनकपुरधाम, १४ माघ । जनकपुरको राराब क्याम्पसका विद्यार्थीहरुले उठाएको माग पुरा गरिने प्रतिवद्धता जनाइएको छ ।

विभिन्न आन्दोलन मार्फत उक्त कलेजका विद्यार्थीहरुले राख्दै आएको मागका बुँदाहरुलाई निमित्त क्याम्पस प्रमुख बीरेन्द्र यादवले पुरा गर्ने प्रतिवद्धता जनाएका छन् । क्याम्पसको शैक्षिक अवस्थामा सुधार, पठन पाठन नियमित, कक्षाकोठाको उत्तम व्यवस्था लगायत अन्य मागका बुँदाहरु उपर विचार गरी पुरा गर्ने प्रतिवद्धता जनाएका छन् ।

क्याम्पसको तर्फबाट निमित्त प्रमुख यादवले माघ ११ गते विद्यार्थी संगठनलाई एक पत्रमा माग सम्बोधन गर्ने बारे लेखेका छन् । राराब क्याम्पसमा राजनीतिले जडो गाडेपछि प्राध्यापकहरु सहित सिधासाधा विद्यार्थीहरुलाई समेत मार भएको देखिएको छ ।

केही राजनीति निकट विद्यार्थी संगठनले राराबको अवस्था सुधारको लागि माग गर्दै तत्कालिन क्याम्पस प्रमुखलाई सुनुयोेजित तरिकाले कालोमोसो समेत दलेका थिए । त्यतिबेला क्याम्पस प्रमुख आन्दोलित विद्यार्थी संगठनको प्रतिपक्षी दलको भएकै कारण पनि कालोमोसो दलिएको बताइएको छ ।

राराब क्याम्पसलाई बर्बाद पार्न विद्यार्थी संगठन र त्यस संगठनका केही भनौदा नेताहरुको हात मात्र रहेको देखिएको छ । तर राजनीतिक खेलझैँ बेला बेलामा आन्दोलन र विभिन्न प्रकारको कार्यक्रम गर्दै विद्यालयको नियमित व्यवस्थालाई धरापमा पारेको देखिएको छ ।

प्रध्यापकहरु समेत कुनै न कुनै राजनीतिक दलको भातृ संगठनसँग आवद्ध भएको कारण र विद्यार्थी नेताहरु तथा आम विद्यार्थीहरु समेत कुनै राजनीतिक दलको भातृ संगठनकै कार्यकर्ता भएकोले पनि राराबको अवस्था दयनीय बनाएको महसुस गर्न सकिन्छ ।