धनुषाको वन फडानीमा वन अध्यक्षकै संलग्नता, यसरी पक्राउ परेपछि...

जनकपुरधाम, ९ माघ । धनुषाधाम नगरपालिकास्थित मालटोल सामुदायिक वन फडानी भइरहेको खुलेको छ । सेक्टर वन कार्यालय पुष्पवलपुरले एक ट्याक्टर काँचो रुख काटेको अवस्थामा बरामद गरेपछि सामुदायिक वन अध्यक्ष शत्रुधन यादबले नै वन फडानीमा संलग्नता खुलेको हो ।

सोमवार ज १ त २८०० नम्बरको ट्याक्टरमा काँचो रुख काटेर लगिरहेको अवस्थामा वन कार्यालयले बरामद गरेको छ । उक्त ट्याक्टर वन अध्यक्ष यादबको रहेको स्थानीयले जनाएको छ । तर अध्यक्ष यादबले भने ट्याक्टर आफ्नो नभई भाइको रहेको दावी गरे । उनले वन फडानीमा आफ्नो संलग्नता नभएको पनि प्रतिक्रिया दिएका छन् । तर स्थानीयले उनकै संलग्नतामा पटक पटक वन फडानी भएको बताउँछन् ।

सेक्टर वन अधिकृत विष्णु यादबले वन फडानी गरेको काँचो रुखसहित ट्याक्टर बरामद भएपनि लुकाउने प्रयास गरेको छ । उनले मंगलवार दिनभर वन अध्यक्ष यादबसँग बार्गेनिङ गरेको स्रोतको दावी छ । तर वार्गेनिङ नमिल्दा कारबाही गर्ने मनस्थिति बनाएको छ । उनले ट्याक्टर कसको रहेको कुरा थाहा नभएको बताए ।

उनले बुधवार ट्याक्टर कसको भएको बुझ्न यातायात कार्यालयलाई पत्र लेख्ने प्रतिक्रिया दिए । उनले भने– 'ढुक्क हुनुस् वन फडानी गर्नेलाई कडा कारबाही हुन्छ ।’ पक्राउ परेको दुई दिनपछि किन यातायातबाट गाडीबारे बुझ्ने जिज्ञासामा उनले कहि बोल्न मानेनन् । उनले कुन वनबाट रुख काटेको विषयमा पनि अनभिज्ञता जनाए ।

यता, धनुषाधाम नगरपालिका वडा नं. ९ का वडाध्यक्ष संजीव यादवले भने, उक्त घटनामा वन हाकिमको समेत संलग्नता हुन सक्ने आरोप लगाए । विगत ३ दिनदेखि पक्राउ गरेर राखेपनि अहिलेसम्म कारवाही नगरेको तथा ट्याक्टर चालक सहित त्यतिबेला अन्य मान्छे भएपनि उनीहरु कहाँ गएको भन्दै प्रश्न गरे ।