सिरहामा जंगली फल खाँदा १७ जना बिरामी, १ को अवस्था चिन्ताजनक !

न्यूज ब्यूरो, सिरहा । सिरहामा जंगली फल खाँदा १७ जना बिरामी भएका छन् । घाईते भएका १५ जना बालबालिकासहित १७ जना मध्ये एकजनाको अवस्था गम्भीर रहेको छ ।

बाख्रा चराउन गएको बेला बघण्डी नामक फल खाँदा उनीहरु बिरामी भएको जिल्ला प्रहरी कार्यालय सिरहाले जनाएको छ ।

जंगली फल खाँएर संखुवानान्कारकट्टी गाउँपालिका–१ मौवाहीकी ३५ वर्षीय शिव कुमारी सदाय, उनकी ५ वर्षीया छोरी सम्झना सदाय, ३० वर्षीय नयन कुमारी सदाय, उनका ३ वर्षीय छोराअविन, देबनारायण सदायका ४ वर्षीय छोरा अमित कुमार सदाय, संजय सदायका २ वर्षीय छोरा संजित सदाय, ४ वर्षीया चन्द्रिका सदाय, ठगदेब सदायका ७ वर्षीय छोरा अशोक सदाय, सगुनिया सदायका ७ वर्षीय करण सदाय, अगुन सदायकी ५ वर्षीया छोरी कल्पना सदाय, ६ वर्षीय छोरा रविन सदाय, लक्ष्मण सदायकी ७ वर्षीया छोरी पविता सदाय, देबिन्दर सदायका ८ वर्षीय छोरा जीवन सदाय, ९ वर्षीय सन्तोष सदाय, ५ वर्षिया छोरी सजन कुमारी सदाय, छोटका सदायका १० वर्षीय छोरा शनिचर सदाय र लक्ष्मण सदायकी ४ वर्षिया छोरी सञ्जना सदायसहित १७ जना बिरामी परेका छन् ।

बिरामी परेकी सञ्जना सदायको अवस्था गम्भीर रहेको छ । उनलाई थप उपचारका लागि धरान स्थित विपी कोइराला स्वास्थ्य विज्ञान प्रतिष्ठान रिफर गरिएको छ ।

बाँकी १६ जनालाई लहानस्थित राम कुमार सारडा उमा प्रसाद स्मारक अस्पतालमा र कामना नर्सिङहो लहानमा भर्ना गरी उपचार भइरहेको जिल्ला प्रहरीले जानकारी दिएको छ ।