मधेशका प्रथम सहिद 'रमेश महतो' को शालिकमा मधेशका मुख्यमन्त्रीको माल्यार्पण

लहान, ५ माघ । मधेशका मुख्यमन्त्री मो. लालबाबू राउत गद्दीले मधेशको प्रथम सहिद रमेश महतोको शालिकमा माल्यार्पण गरेका छन् ।

प्रत्येक वर्ष माघ ५ गते मनाउँदै आएको बलिदानी दिवसको अवसरमा अन्य वर्षहरुमा स्वतन्त्र मधेश गठबन्धनका सँयोजक डा. सिके राउतको सहभागीता रहेको भएपनि यसपाली प्रदेशका मुख्यमन्त्रीले सहिद महतोको शालिकमा माल्यार्पण गरेको हो ।

दोस्रो मधेश आन्दोलनको क्रममा सिरहाको लहानमा वि.स. २०६३ साल माघ ५ गतेका दिन नै रमेश महतोलाई गोली हानी हत्या गरेपछि उनलाई मधेशको प्रथम शहिद घोषणा गरिएको हो । मधेशको प्रथम शहिदको रुपमा रहेको रमेश महतोको शालिक लहानको बीच चौकमै अवस्थित रहेको छ ।

मधेशका मुख्यमन्त्री मो. लालबाबू राउत सहित मधेशसवादी दलका अन्य नेताहरुहरुले समेत उनको शालिकमा माल्यापर्ण गरी श्रद्धाञ्जली तथा बलिदानी दिवस मनाइएको हो । सो क्रममा प्रदेश सरकारका सत्तापक्ष संघीय समाजवादी फोरम नेपालका अध्यक्ष उपेन्द्र यादवले समेत उनको शालिकमा माल्यार्पण गरेका हुन् ।

गत वर्षहरुमा गठबन्धनका सँयोजक डा. सिके राउत बलिदानी दिवसमा सहभागी भएको बेला लाखौँको सँख्यमा मधेशी जनताहरु बलिदानी दिवसमा ओर्लिएको भएपनि यसपाली डा. राउतलाई हिरासतमा राखिएपछि बलिदानी दिवस पनि फित्तलो देखिएको थियो ।

मधेशीको बलिदानी दिवसको अवसरमा मधेशवादी दलका नेताहरुले रमेश महतो लगायत अन्य शहिदहरुको सम्झनामा मौन धारण गर्दै उनको परिवारलाई समेत मँचमा बोलाएर सम्मान गरेको हो । शहिदको सपना भने देशमा संघीयता आएर केही प्रतिशत साकार भएको नेताहरुले बताए ।

यता, मधेशी युवाहरुले भने शहिदको सपना साकार कहिले हुने भनेर प्रश्न अझै सार्वजनिक रुपमै गरिरहेका छन् । गत भदौ ७ गते फोरमका अध्यक्ष उपेन्द्र यादवलाई झण्डा देखाउँदा तथा मधेशी शहिदको सपनाबारे सोध्दा गठबन्धनकै नेता राम मनोहर यादवलाई प्रहरी हिरासतमा राखिएको थियो । केही दिनपछि उनको मृत्यू प्रहरी हिरासतमा भएको थियो ।