गोलबजारमा पुस्तकालय स्थापना गर्दै सुरु भयो २ दिने ‘शैक्षिक मेला’

न्यूज ब्यूरो, सिरहा । सिरहाको गोलबजार नगरपालिका–३ जम्दहमा २ दिने ‘बृहत्त शैक्षिक विद्यार्थी मेला’ सुरु भएको छ । सिरहाको शैक्षिक विकासमा महत्वपूर्ण योगदान पुग्ने लक्ष्यसहित आरम्भ साईन्स एण्ड कल्चर कल्बद्धारा आयोजित दुई दिने शैक्षिक मेला आज (शुक्रबार) देखि सुरु भएको हो ।

क्लबले ‘परिवर्तनका लागि शिक्षा, शिक्षाका लागि पुस्तकालय’ भन्ने मुल नाराका साथ आजै जम्दहमा पुस्तकालय स्थापना गरेको छ । पुस्तकालय स्थापनाकै अवसर पारेर शैक्षिक मेला आयोजना गरिएको क्लबले जनाएको छ ।

पुस्तकालयको उद्घाटन गोलबजार नगरपालिकाका नगरप्रमुख देवनाथ साहबाट गरिएको छ । पुस्तकालयका लागि क्लबका सदस्यहरुले आफू अध्ययनरत काठमाडौं, धरान, विराटनगर लगायतका ठाउँहरुबाट पुस्तक संकलन गरेर ल्याएका छन् । मेयर साहले क्लबको प्रशंसा गर्दै आउँदा दिनहरुमा सक्ने सहयोग गर्न पछि नहट्ने प्रतिवद्धता जनाए । समाजमा शिक्षाको ज्योति छर्न क्लबका युवाहरुले अहोरात्र खटेर पुस्तक संकलन गरी पुस्तकालय स्थापना गर्न भ्याएको प्रयासलाई सबैले प्रशंसा खुलेरै प्रशंसा गरेका छन् ।

कार्यक्रमलाई सम्बोधन गर्दै जिल्ला शिक्षा अधिकारीले क्लबको यो प्रयास शैक्षिक सुधारका लागि एउटा नमूना मात्र नभई शैक्षिक सुधारका लागि सबैलाई पाठ सिकाएको जिकिर गरे ।

सिरहाको शैक्षिक स्तर सुधार गर्ने हेतुले आजबाट सुरु भएको शैक्षिक मेलामा २ दिने हाजिरी जवाफ प्रतियोगिता समेत सुरु भएको छ भने मेलामा आज रँगोली समेत झल्काइएको छ । मेलामा डकुमेन्ट्री प्रेजेन्टेसनसँगै सांस्कृतिक कार्यक्रमहरुको समेत आयोजन गरिएको क्लबका अध्यक्ष रामकुमार यादवले बताए ।

कार्यक्रमलाई सम्बोधन गर्दै जिल्ला शिक्षा अधिकारीले विद्यार्थीहरु भित्र लुकेर रहेका प्रतिभालाई प्रष्टफूटन गर्न क्लबले गरेको प्रयासलाई सराहना गरेका थिए । उनले क्लबको यो प्रयास शैक्षिक सुधारका लागि एउटा नमूना मात्र नभई शैक्षिक सुधारका लागि सबैलाई पाठ सिकाएको जिकिर गरे ।

भोलि (शनिवार) मेला सम्पन्न हुनेछ । हाजिरी जवाफ प्रतियोगिताका उत्कृष्ट विजेता १५ जना विद्यार्थीहरुलाई काठमाडौं, बिराटनगर, जनकपुर र सिरहा जिल्लाको विभिन्न कलेजहरुमा उच्च शिक्षाका लागि छात्रवृत्ति प्रदान गरिने व्यवस्था मिलाइएको क्लबले जनाएको छ ।

कार्यक्रममा नगरप्रमुख, उप–प्रमुख, जिल्ला शिक्षा अधिकारी, वडाध्यक्ष, जिल्लाभरीका विद्यालयहरुका विद्यार्थी तथा शिक्षकहरु लगायत विभिन्न व्यक्तित्वहरुको जोडदार सहभागिता रहेको थियो ।