मधेशकै प्रसिद्ध 'मकर मेला' को ट्रेलर धनुषाधाममा

जनकपुरधाम, १ माघ । तराई मधेशको प्रसिद्ध मेलाको रुपमा मानिएको धनुषाको धनुषाधाम स्थित लाग्ने मकर मेला पनि एक हुन् ।

माघ चढे लगत्तै प्रत्येक आईतबार विशाल मेलाको आयोजना एक महिनासम्म हुने गर्दछ भने माघको पहिलो दिन मकर सँक्रान्तिको दिन हजारौँको सँख्यामा दर्शालुरु एका बिहानै धनुष मन्दिर पुगेर पूजाआजा थालेका छन् ।

त्रेतायुगमा भगवान रामले शिव धनुषलाई तीन टुक्रा पारी फाल्दा एक टुक्रा धनुषाको धनुषाधाममा खसेको ईतिहास रहेको छ । भगवान रामले फालेको धनुषको टुक्राकै इतिहासमा उक्त ठाउँलाई धनुषाधाम भनिएको छ भने जिल्लाकै नाम पनि धनुषा राखिएको हो । जनकपुरभन्दा २० किलोमिटरको दुरीमा रहेको धनुषाधाम प्रमुख पर्यटकीय स्थलको रुपमा चिनिन्छ ।

धार्मिक एवम् पर्यटकीय ठाउँको रुपमा चिनारी बनाएको धनुषाधाममा प्रत्येक वर्ष माघ १ गते मकर सँक्रान्ति अर्थात तिला सकराईतमा धनुष मन्दिरमा भीड लाग्ने गरेको छ । विहानैदेखि श्रद्धालुहरु जलफूल लिएर पूजाआजा थालेका छन् ।

आउँदो आईतबारदेखि भयँकर मेला पनि लाग्ने भएको छ । जसको लागि धनुषाधाम नगरपालिकाले मेलाको ठेक्का पनि लगाइसकेका छन् । प्रत्येक वर्षको माघ महिनाको सुरुको आईतबारदेखि पुरै एक महिनासम्मै मकर मेला लाग्ने गरेको छ ।

धनुषाधाममा लाग्ने मकर मेलामा तेजपात (एक प्रकारको मशाला पात) को लागि प्रख्यात मानिएको छ । मेलामा भारतबाट पनि अत्यधिक सँख्यामा मेला भर्नको लागि दर्शालुहरु धनुषाधाम आउने गरिन्छ । छालामा हुने एक प्रकारको मुुसो रोग धनुषाधाममा बैगनको भार चढाएपछि निको हुने जनविश्वास रहिआएको छ ।