विकासका लागि शिक्षा आवश्यक छ, शिक्षामा बढी लगानी गर्छु : कान्छो मेयर

जनकपुरधाम, २८ पौष । मुलुकै कान्छो र विकासशील मेयर भनेर नाम कमाएका धनुषा सहिदनगर नगरपालिकाका मेयर उदय कुमार बरबरिया (यादव) ले विकासका लागि शिक्षा आवश्यक रहेकोे भन्दै शिक्षामा बढी लगानी गर्ने बताएका छन् । स्थानीय सरकारको पूर्ण अधिकार प्रयोग गरी आफ्नो छुट्टै छवि बनाईरहेका मेयर बरिबरियाले नमुना नगरको परिकल्पना पूरा गर्नका लागि शिक्षामा अधिकतम बजेट खर्चिने बताएका हुन् ।

सहिदनगरको यदुकूहामा नगरप्रमुख बरबरियाको विशेष पहलमा नगर शिक्षा समितिद्वारा हुँदै आइरहेको अतिरिक्त क्रियाकलाप अन्तर्गतको २ दिने नगरस्तरीय अन्तर विद्यालय खेलकुद प्रतियोगिता कार्यक्रमलाई सम्बोधन गर्दै मेयर बरबरियाले आफूले बोकेको स्मार्ट नगर र विकासशील नगरको सपना पूरा गर्न शिक्षालाई विशेष प्राथमिकतामा राखेको बताए ।

विकासको मेरुदण्ड शिक्षा भएकाले यस वर्षको अधिकतम बजेट शिक्षामै लगानी गर्ने बताउँदै उनले पछिल्लो समय नगरको शिक्षामा सुधार देखिएको भन्दै शिक्षकहरुलाई धन्यवाद ज्ञापन गरे ।

उनले विद्यार्थीहरु भित्र लुकेको अन्तरनिहित प्रतिभालाई प्रष्टफूटन गर्नका लागि अतिरिक्त क्रियाकलापमा जोड दिएको जनाए । मेयर बरबरियाले खेलकुदले शरीरलाई स्वास्थ तन्दुरुस्त तथा फूर्तिलो बनाउने मनोरञ्जन प्रदान गर्ने र प्रतिस्पर्धा क्षमता बढाउने भएकोले सबैलाई केही समय खेलकुदमा खर्चिन आग्रह समेत गरे ।

कार्यक्रमलाई सम्बोधन गर्दै मेयर बरबरियाले आफूले बोकेको नमुना नगरको सपना पूरा गर्नका लागि सबैको सहयोग अपरिहार्य रहेको औल्याए ।

नगर शिक्षा समितिको आयोजना तथा नगरप्रमुखको पहलमा आयोजित २ दिने नगरस्तरीय अन्तर विद्यालय खेलकुद प्रतियोगिता आज सम्पन्न हुनेछ ।

कार्यक्रममा नगरकी उपप्रमुख शिला देवी कापर, प्रमुख प्रशासकीय अधिकृत रामकिशोर महतो, शिक्षा संयोजक रामरतन पासमान, वडाध्यक्ष, सदस्य धनेश्वर प्रसाद यादव लगायतकाले आ-आफ्नो मन्तव्य प्रस्तुत गरेका थिए ।