‘पप्पु’ले ९ वर्षमा पनि बनाएन कमला र बलानको पुल, संघर्ष समिति रिले अनशनमा

न्यूज ब्यूरो, सिरहा । सिरहा–धनुषा जोड्ने कमला र सिरहा–सप्तरी जोड्ने बलान नदीको पुलको निर्माणको काम समयमा सम्पन्न नभएपछि हुलाकी सडक संघर्ष समितिले अनिश्चितकालिन रिले अनसन सुरु गरेको छ । सम्झौता भएको साढे ३ वर्षभित्र निर्माणको काम सकाउनुपर्ने पुलको ९ वर्षबढी बितिसक्दा पनि हालसम्म आधा काम समेत भएको छैन ।

संघर्ष समितिले अबको ६ महिनाभित्र निर्माण सुनिश्चितताको मागसहित सिरहा सदरमुकामस्थित हुलाकी सडकमै अनिश्चितकालिन रिले अनसन सुरु गरेको हो । वि. सं. २०६८ साल जेठ ३१ गतेमा पप्पु कन्सट्रक्सनलाई २८ करोड १५ लाखमा दिइएको कमला नदीे पुलको निर्माण कार्य २०७१ साल मंसिर ३१ गते नै सक्नुपर्ने थियो । तर, हालसम्म मात्र ३० प्रतिशत भन्दाबढी काम हुन सकेको छैन ।

सरकारले कामको मूल्यांकन नै नगरी पप्पु कन्सट्रक्सनलाई ५० प्रतिशत (१४ करोड) रुपैयाँसमेत भुक्तानी दिइसकेको छ । सिरहा र सप्तरी जोड्ने बलान नदीको पुलको निर्माण कार्यसमेत यस्तै अवस्थामा छ ।

पप्पुुले पुल निर्माणको काम अलपत्र पारेपछि सर्वसाधारणलाई निकै सास्ती भोग्नुपरिरहेको छ । कमला र बलान नदीको पुल समयमै निर्माण हुन नसकेका कारण धनुषा, सिरहा र सप्तरीको लाईफ लाईन मानिएका हुलाकी सडक नै अवरुद्ध रहेको छ ।

सरकारकै लापरवाहीका कारण ‘पप्पु’ले पुलको निर्माण कार्य अलपत्र पारेको हुलाकी सडक संघर्ष समितिका संयोजक तथा नयाँ शक्ति पार्टी नेपालका नेता रामरिझन यादवले आरोप लगाए । ६ महिनाभित्र पुल निर्माणको काम सम्पन्न नभए अर्को कम्पनीसँग ठेक्का सम्झोता गर्न उनले माग समेत गरेका छन् ।

यस्तै, रिले अनसनमा एक्यवद्धता जनाएका प्रदेश २ सरकारका उद्योग, पर्यटन, वन तथा वातावरण राज्यमन्त्री सुरेश मण्डलले निर्माण कम्पनीलाई कारबाही गरी नयाँ ढंगले काम सुरु गर्नुपर्ने बताए ।

यता, कमला नदी पुल निर्माणका ईन्चार्ज जामुन यादवले सम्झौता अनुसार सरकारले रकम निकासा नगर्दा समय लागेको बताए ।