डा. सिके राउतलाई ३ महिनापछि बाहिर निकालेर यहाँ लैजादै

जनकपुरधाम, १९ पुस । स्वतन्त्र मधेश गठबन्धनका सँयोजक डा. सिके राउतलाई झण्डै ३ महिनापछि बाहिर निकाल्न लागिएको हो ।

गत असोज २१ गतेदेखि नै प्रहरी हिरासतमा राखिदै आएका डा. राउतलाई बुधबार मात्र काठमान्डौँको सेन्ट्रल जेलमा लगिएको छ भने उनको स्वास्थ्य अवस्थालाई मध्यनजर गर्दै काठमान्डौँको टिचिँग अस्पताल महाराजगँजमा चेकजाँच गराइने भएको छ ।

राज्य विरुद्धको संगठित अपराध तथा राज्य विरुद्धको विप्लव मुद्दामा झण्डै ३ महिनादेखि प्रहरी हिरासतमा रहँदै आएका डा. राउतलाई रौतहट प्रहरीले चेकजाँच समेत गराउन दिएको थिएन भने गठबन्धनका प्रवक्ता अब्दुल खान सहितका टोलीले राष्ट्रिय मानव अधिकार आयोगमा उजुरी तथा ध्यानाकर्षण गराएपछि उनलाई स्वास्थ्य चेकजाँचको लागि काठमान्डौँ लगिएको हो ।

डा. राउतलाई रौतहट जिल्ला अदालतबाटै पक्राउ गरी हिरासतमा राखिदै आएको छ । डा. राउत पक्राउ परेपछि बन्दी प्रत्यक्षीकरणको रिट सर्वोच्च अदालत काठमान्डौँमा गरेपनि अदालतले उनको रिट खारेज गरेपछि पुनः रौतहट अदालतमा पेशी चढाइएको थियो ।

डा. राउतलाई पत्थरीको विरामी भएको जानकारी छ । उनलाई उपचारको लागि स्वास्थ्य परीक्षण अति आवश्यक रहेको भन्दै उनलाई स्वास्थ्य परीक्षणकै लागि काठमान्डौँ सेन्ट्रल जेलमा केही दिनको लागि सारिएको बुझिएको छ ।

गठबन्धनकै राम मनोहर यादवको शव अहिलेसम्म पनि काठमान्डौँको टिचिँग अस्पताल महाराजगँजमै राखिएको छ । डा. राउतलाई आज –विहिबार) स्वास्थ्य परीक्षण गरिने छ । उनलाई भेट गर्न पनि कडाई गरिएको बुझिएको छ भने महाराजगँज टिचिँग अस्पालमा उनका समर्थकहरु भेटघाट गर्न उपस्थित हुने बुझिएको छ ।