जनकपुरबाट चोरका गिरोह पक्राउ, ५५ इन्चको LED देखि अक्सीजन सिलिण्डरसम्म बरामद

जनकपुरधाम, १८ पुस । जनकपुरधाम सहित जिल्लाको विभिन्न स्थानमा चोरी गरी भाग्दै गरेका एक गिरोहलाई नै प्रहरीले पक्राउ गरेको छ ।

जिल्ला प्रहरी कार्यालय धनुषाले बुधबार चोरीका विभिन्न घटनामा संलग्न भएको मुख्य गिरोहलाई समान सहित पक्राउ गरी पत्रकार सम्मेलन मार्फत सार्वजनिक गरेका हुन् । अँग्रेजी नयां वर्षकै दिन पुस १७ गते उनीहरुलाई पक्राउ गरी बुधबार सार्वजनिक समेत गरिएको हो ।

पक्राउ पर्नेहरुमा जनकपुरधाम उपमहानगरपालिका वडा नं. ४ महाविर चोक बस्ने बर्ष २२ का अभिमन्यू कुमार साह, जिल्ला महोत्तरीको औरही नगरपालिका वडा नं. ३ सोनामाई बस्ने वर्ष १८ का रमेश कुमार साह र जिल्ला धनुषा औरही गाउँपालिका वडा नं. १ बस्ने वर्ष २१ को मो. इलियाकत राइन रहेका छन् ।

पुस १७ गते मँगलबार नै उनीहरुलाई जनकपुरधाम उपमहानगरपालिका वडा नं. १२ हनुमानगर स्थितबाट जिल्ला प्रहरी कार्यालय धनुषाबाट खटिगएको टोलीले विशेष खोजतलासको क्रममा उनीहरुलाई पक्राउ गरिएको प्रहरीले जनाएको छ ।

उनीहरुलाई चोरीको मुद्दामा म्याद थप गरी अनुसन्धान जारी राखेको जनाइएको छ ।

पक्राउ गरिएकाहरुबाट स्यामसँग कम्पनीको एलइडी टिभी ५५ ईन्चको १ थान, ल्यापट १ थान, मोबाईल ६ थान, खुकुरी १ थान, सुन जस्तो देखिने दाना २ थान, सुन जस्तो देखिने मँगलसुत्र २, सुन जस्तो देखिने टीकाको टुक्रा ७ थान, कानमा लगाउने सुन जस्तो देखिने झुम्का १ जोडी, सुन जस्तो देखिने सिग्री १ थान, चाँदी जस्तो देखिने कानमा लगाउने झुम्का १ जोर, चाँदी जस्तो देखिने कटौरा १ थान, चाँदी जस्तो देखिन पाउजु ७ थान, मोति सेट भएको बाला १ थान, पाउजु १ जोर , ढोका र झ्यालमा लगाउने पर्दा १० थान, अक्सिज ग्यास सिलिण्डर १ थान, ग्यास रेगुलटर १ थान, ग्यास पाईप फलामको १ थान, ग्यास पाईप १ रिँग र फाईटर १ थान रहेको जिल्ला प्रहरी कार्यालय धनुषाले जनाएको छ ।

उनीहरु उपर गत असार ६ गते जनकपुरधाम उपहानगरपालिका वडा नं. २ स्थित रहेको सलिम मोबाईल पसलमा चोरी, भदौ १० गतेमा जनकपुरधाम ४ किशोरी दुबेको घरमा चोरी, भदौ २७ गते जनकपुरधाम १ स्थित राम पुकार रायको घरमा चोरी, २९ गते जनकपुरधाम ४ स्थित रहेको सुरेन्द्र कुमार यादवको घरमा चोरी, असोज २० गतेमा सँतोष शर्माको फलाम पसलमा चोरी, कार्तिक ६ गतेमा जनकपुरधाम १ स्थित घर रहेको कृष्णदेव साहको घरमा चोरी, २७ गते वडा नं. २ स्थित जगदिश साहको घरमा चोरी तथा मँसिर ३० गतेमा जनकपुरधाम उपहानगरपालिका वडा नं. ८ स्थित रहेको रत्न कुमार चौधरीको घरमा चोरी गरिएको आरोप लगाइएको छ ।

उनीहरुलाई चोरीको मुद्दामा म्याद थप गरी अनुसन्धान जारी राखेको जनाइएको छ ।