जनकपुरको मशाला कटेजमा ओरकेष्ट्रा, जिल्ला प्रहरी कार्यालय अगाडी नारावाजी ( भिडियो सहित)

जनकपुरधाम, १७ पुस । धनुषामा जिल्लामै प्रतिबन्धित गरिएको केटी नाच (ओरकेष्ट्रा) गएराती जनकपुरमै रातभरि नै नचाइएको छ ।

विभिन्न समयमा विभन्न अफरको घोषणा गर्दै जनकपुरको मशाला कटेजमा नयाँ वर्ष सहित विभिन्न कथित उत्वसमा यस्ता प्रतिबन्धित नाचगान गराउने गरेको देखिएको छ । यसै क्रममा गएराती महाविर युवा कमिटिका अध्यक्ष रोशन शेखर जयसवाल र कार्यकारणी सदस्य आशुतोष साह छोटुलाई जिल्ला प्रहरी कार्यालय धनुषाले पक्राउ गरेको छ ।

कथित एवम् विदेशी नयाँ वर्षको उपलक्ष्य भन्दै मशाला कटेजमा राखिएको कार्यक्रमको क्रममा महाविर युवा कमिटिका पदाधिकारीहरु पनि पुगेका थिए । कमिटिका पदाधिकारीहरुले बेकसुरमै कसैको उक्साहट र ईसारामा पक्राउ गरी जिल्ला प्रहरी कार्यालय धनुषामा राखिएको बताइएको छ ।

जनकपुरमा प्रहरी विरुद्ध नारावाजी गर्दै युवाहरु

'राती करिब २ बजेसम्म जिल्लामै प्रतिबन्ध गरिएको केटीनाच अर्थात् भारतको विहार तर्फबाट मगाइएको अश्लिल गीतहरुमा नृत्य गर्ने महिला नर्तकीहरु नचाइयो मशाला कटेजमा । होटलका सँचालक र उससँग साठगाठ भएको कुनै व्यक्तिको इसारामै मौका छोपी महाविर युवा कमिटीका अध्यक्ष र एक सदस्यलाई पक्राउ गराए । जबकी धनुषामा महिला नर्तकी प्रतिबन्ध गरिएको छ त्यस्तो अवस्थामा पनि प्रहरीले केही नभन्नु उल्टै अनुमति दिनु शंका उब्जीएको छ । प्रहरीकै अनुमतिमा त्यस्ता कार्यक्रमहरु राती गरिएको छ । र व्यक्तिगत रिसवीका कारण कसैको ईसारामा दुवै जनालाई प्रहरीले पक्राउ गरेको छ ।'- कमिटिका सदस्य रवि शर्माले बताए ।

उनका अनुसार, राजनीतिक पार्टीको दृष्टिकोण र व्यक्तिगत रिसवीका कारण प्रहरीलाई मिलाएर उनीहरुलाई बिना कारण नै पक्राउ गराइएको हो । उनले भने, महाविर युवा कमिटिबाटै एक जना पदाधिकारलाई कुनै कारणवंश निकालिएको थियो । उनले आफ्नो व्यक्तिगत पहिचान र रिसवी कारण मौका छोपेर पक्राउ गर्न लगाएको हो । उनलाई कमिटिबाट हटाएपछि उनले प्रतिशोधको भावनामा उनीहरुलाई पक्राउ गर्न लगाएको छ ।

उनीहरुलाई पक्राउ गरेपछि महाविर युवा कमिटिका पदाधिकारीहरु तथा अन्य युवाहरुले जिल्ला प्रहरी कार्यालय धनुषा अगाडी प्रहरी विरुद्ध चर्को नारावाजी समेत गरेका हुन् । प्रहरी प्रशासन मूर्दावाद, पक्राउ गरिएकालाई रिहा गर जस्ता चर्को नारावाजी गरेका थिए ।

यता, जिल्ला प्रहरी कार्यालय धनुषाले भने, उनीहरु मशाला कटेजमा प्रहरीसँग हातावाही गरेको भन्दै नियन्त्रणमा लिएको जनाएको छ । प्रहरीसँग बहस गरेको भन्दै उनीहरुलाई पक्राउ गरिएको जनाइएको छ ।

महाविर युवा कमिटिका पदाधिकारीहरुले भने त्यस्तो केही नगरिएको र गरिएको छ भने होटलमा लगाइएको सिसिटिभी क्यामेराको फुटेजमा देखाउन चुनौति दिएका छन् ।