राममनोहरको शव अझ अस्पतालमै, अन्तराष्ट्रिय अदालत जाने तयारी !

न्यूज ब्यूरो, जनकपुरधाम । प्रहरी हिरासतमै शंकास्पद मृत्यू भएका स्वराजी राम मनोहरको लास (शव) विगत १०१ दिनदेखि अस्पतालमै रहेको छ । परिवारले माग पूरा नभएको भन्दै शव बुझ्न मानेका छैनन् ।

गत भदौ १४ गते प्रहरी हिरासतमै मृत्यू भएका स्वतन्त्र मधेस गठबन्धनका नेपालगँजका नेता मृतक राममनोहरलाई सहिद घोषणा, घटनामा संलग्नमाथि कारबाही, उचित क्षतिपूर्ति र परिवारको पालनपोषण जिम्मा सरकारले लिनुपर्ने माग छ ।

स्वतन्त्र मधेश गठबन्धनका प्रवक्ता अब्दुल खानले न्यूज ब्यूरोसँग भने, ‘राममनोहर यादवलाई नेपालमा न्याय भेटेन भने अन्तराष्ट्रिय अदालतमा जान्छौं हामि, स्वतन्त्र मधेश गठबन्धन त्यसको तयारीमा छ, राममनोहरले के अपराध गरेको थियो ?, डा. सिके राउतलाई वेवजह किन जेल सजाय गरियो ?, नेपालको न्यायालयको वास्तविकता के हो भनेर साबित भइसकेको छ, अब हामि न्यायको लागि अन्तराष्ट्रिय कोर्ट अफ जस्टिसमा जाने तयारीमा छौं ।’

गत भदौ ७ गते बर्दियामा कार्यकर्ता भेटघाटको क्रममा पुगेका संघीय समाजवादी फोरम नेपालका अध्यक्ष एवं वर्तमान संघीय सरकारका स्वास्थ्यमन्त्री उपेन्द्र यादवलाई कालो झण्डा देखाएपछि प्रहरीले हिरासतमा लिएको थियो ।

जाबो कालो झण्डा देखाएर विरोेध गर्दा मन्त्री यादवले उनलाई पक्राउ गर्न आदेश दिएको थियो । त्यही प्रकरणमा उनलाई एक सातासम्म प्रहरी हिरासतमा राखिएको थियो । पक्राउ परेको ७ औँ दिनमा उनको प्रहरी हिरासतमै शंकास्पद मृत्यू भएको थियो ।

राम मनाहरको मृत्यूपछि मधेसमा बलेको आगो अहिले साम्य भएको छ भने अहिलेसम्म उनको शव शिक्षण अस्पताल महराजगँजमा प्रहरीको निगरानीमा राखिएको छ ।

गठबन्धनले राममनोहर यादवको अन्तिम संस्कार गर्न वातावरण मिलाई दिन नेपाल सरकार र मानवअधिकार संघसंगठनसँग अपिल समेत गरेको छ ।