सुनसरीमा ईन्काउण्टरको अधिकारसहित सादा पोसाकमा  'खुफिया दस्ता' परिचालित

चन्दन रौनियार, सुनसरी । सुनसरी प्रहरीले जिल्लामा बढ्दो सुरक्षा थ्रेटलाई मध्यनजर ‘गोली चलाउने’ (इन्काउन्टर) को अधिकार सहित बिशेष प्रहरी टोली परिचालन परिचालन गरेको छ ।

सुनसरीमा दुई महिनाको अवधीमा अज्ञात समूहको गोली प्रहारबाट दुई हाईप्रोफाईल हत्यासँगै साना हतियारको तस्करीका एकपछिको अर्को घटनाले जिल्लाको शान्ति सुरक्षाको विषय प्रहरी प्रशासनका लागि टाउको दुखाई बन्न पुगेको छ ।

असोज ४ गते दिनदहाडै हरिनगर गाउँपालिका वडा नं. २ भुटाहामा मुस्लिम अगुवा खुर्शिद आलममाथि गोली प्रहार हुँदा घटनास्थलमै उनको ज्यान गयो । सो घटनाको अनुसन्धान टुङगो नलाग्दै ६१ दिनपछि दुहवी नगरपालिका ९ छाताबेलीका फिदा हुसेन उपर मंसिर ५ गते विहान गोली हानियो र उनको समेत ज्यान गयो ।

दुवै हत्याका घटनामा अपरिचित समूहले गोली प्रहार गरेर फरार भए । फिदा घटना ताजै छ र जुन अनुसन्धानकै चरणमा छ । प्रहरीले फिदा हुसेन हत्याकाण्डसँग जोडिएका विविध पक्षको सूक्ष्म अनुसन्धानलाई जारी राखेको बताएको छ ।

उता हुसेन हत्या पूर्व भुटाहामा आलमको गोली हानी हत्या भएको घटना अनुसन्धानको निचोड नजिक पुगेको बताउँने प्रहरीले हत्यारा भने पक्राउ गर्न सकेको छैन् ।

यसैबीच प्रहरीले जिल्लामा बढ्दो सुरक्षा थ्रेटलाई मध्यनजर गर्दै खुफिया दस्ता परिचालन गरेको छ । विशेष तालिम प्राप्त दस्तामा हतियारसहित ठूलो संख्यामा सादा पोशाकका सुरक्षाकर्मी जिल्लाका सुरक्षा संवेदनशिल क्षेत्रहरुमा परिचालित गर छ ।

प्रहरी स्रोतले दिएको जानकारीअनुसार आवश्यकता परेको खण्डमा गोली चलाउन आदेश कुर्नु पर्ने छैन् । अवस्थालाई मध्यनजर गर्दै जवाफी कार्वाही गर्न सक्ने अधिकार पाएको सुरक्षाकर्मीको आवश्यकता परेको खण्डमा काउण्टरमा उत्रन सक्ने बताइएको छ ।

खुला सीमा क्षेत्रमा हुने आवतजावतसँगै आपराधिक कार्यमा संलग्न रहेकाहरुको सकृयता देखिन सक्ने अवस्थालाई मध्यनजर गर्दै नेपाल भारत सीमासहित आसपासको क्षेत्र र सम्भावित सुरक्षाथ्रेट र संवेदनशील मानिएका भेगका अलावा जिल्लाभर मुभमेन्ट रहने गरी थप टोली परिचालन गराइ सकिएको सुनसरी प्रहरीले जनाएको छ ।

एकपछि अर्को गोली हानि हत्या गरिएको घटना पश्चात शान्ति सुरक्षाको विषयलाई लिएर आलोचना खेप्नु परिरहेको प्रहरीले आपराधिक प्रवृति नियन्त्रणमा लिन जिल्लाभर एकसाथ टार्गेट काउण्टर रणनीति कार्यान्वयनमा ल्याएको जनाएको छ ।

जसका लागि सुनसरी प्रहरीले अन्य जिल्लामा रही कार्यसम्पादनमा उत्कृष्ट ठहरिएका सुरक्षा मामिलाका दक्ष र अनुभवी जनशक्तिसमेत जिल्ला भित्र्याएको छ ।

गाउँटोलमा सहित सीमा क्षेत्रमा परिचालित सुरक्षाकर्मीको टोलीले शंकास्पद गतिविधिमा संलग्न रहेको पाइए सम्वन्धित व्यक्तिलाई नियन्त्रणमा लिई सोधपुछ गर्ने छ ।

हतियारसहितका व्यक्ति फेला परेको खण्डमा वा सूचनाका आधारमा पिछा गरिएको अवस्थामा मानव अधिकारको उल्लंघन नहुने गरी नियन्त्रणमा लिने प्रयास गरिने बताएको प्रहरीले अवस्था नियन्त्रण बाहिर जाने सम्भावना बढे, आपराधिक व्यक्ति वा समूह सहजै नियन्त्रणमा लिन नसकिए, आक्रमणको सम्भावना बढे वा शान्ति सुब्यवस्थामा खलल पुग्ने अवस्था सृजना हुनजाने पाटोलाई मनन गरी आपराधिक प्रवृतिका व्यक्ति वा समूह उपर सोझै गोली हान्न सक्ने रणनीति साथ सुनसरीमा बिशेष प्रहरी परिचालन गरिएको प्रहरी उच्च स्रोतले जनाएको छ ।

विशेष अप्रेसनमा जुटेको सुनसरी प्रहरीले विगतका वर्षहरुमा जिल्लामा भएका आपराधिक घटनासँग सम्वन्धित रहेका सम्वन्धित व्यक्तिको दिनचर्या र अवस्था बारे समेत लेखाजोखा र निगरानी बढाएको बुझिएको छ ।

विभिन्न घटना वा आपराधिक गतिविधी, लागुऔषध कारोबारी जस्ता अपराधजन्य कार्यमा संलग्न रही सजाय भोगेका वा सजाय काटी रहेकाहरुका हकमा समेत प्रहरीले विवरण दुरुस्त पारेको जनाएको छ ।

फरार रहेकाहरुको हकमा समेत खोजी तिव्र पारेको प्रहरीले शंकास्पद जोकोहीलाई नियन्त्रणमा लिई छानविन गर्ने गरी सुरक्षा रणनीति तय गरेको छ ।

सवारी चेकजाँच, सरप्राइज चेक पोइन्टसहित खानतलासी, काउण्टर पार्टसँगको समन्वयमा खुला सीमाका कारण हुन सक्ने आपराधिक गतिविधि नियन्त्रणमा सहकार्यको थालनीसमेत गरिसकिएको प्रहरीको भनाई छ ।

सुनसरी प्रहरी प्रमुख राजन अधिकारीले संघीय र प्रादेशिक सरकार मातहतबाट प्राप्त निर्देशन र कार्यादेश अनुरुप जिल्लाभर विशेष सुरक्षा रणनीति लागु गरिएको स्विकारेका छन ।

अपराध नियन्त्रण तथा निर्मुल पार्ने अभियान आम नागरिकको सहकार्य विना सम्भव नहुने भन्दै प्रहरी प्रमुख अधिकारीले आवश्यक साथ र सहकार्यका लागि सर्वसाधारणमा आग्रह समेत गरे ।