डा. सिके राउतको पेशी पुनः सारियो, सुप्रिम कोर्टमा उपस्थित हुने

न्यूज ब्यूरो, जनकपुरधाम । सरकारको तर्फबाट आवश्यक कागजपत्र उपलब्ध नहुँदा पटक पटक सारिदै आएको डा. सिके राउत मुद्दाको पेशी पुनः सम्मानीय सर्वोच्च अदालतले सारेको छ ।

विगत ५८ दिनदेखि प्रहरी हिरासतमा रहेका डा. राउतको पेशी पटक पटक सारिदै बुधबार पुनः शुक्रबारको लागि सारिएको हो । आवश्यक कागजपत्र उपलब्ध नहुँदा पेशी सारिएको स्वतन्त्र मधेस गठबन्धनका प्रवक्ता अब्दुल खानले जानकारी दिए ।

यसअघि समेत सरकारको तर्फबाट कागजपत्र उपलब्ध नभएको भन्दै ७ दिनको लागि, त्यसपछि ३ दिनको लागि र पुनः ३ दिनको लागि पेशी सारिएको हो । आगामी पेशी यही शुक्रबार मँसिर १४ गतेको लागि सारिएको हो ।

अब चढने पेशीमा दुवै तर्फबाट वकिलहरुले डा. राउतको मुद्दामा बहस गर्दै फैसला दिने बुझिएको छ ।

गत असोज २१ गते नै रौतहट जिल्लामा राज्य विरुद्धको विप्लव मुद्दाको तारेख लिन गएको बेला जिल्ला प्रहरी कार्यालय रौतहटले डा. राउतलाई पक्राउ गरी हिरासतमा राख्दै आएको छ ।

डा. सिके राउतका दाजु जयकान्त राउत (जेके राउत) ले बन्दी प्रत्यक्षीकरणको रिट दायर गरेपछि उनको मुद्दामा बहस नहुँदै कागजपत्रको अभावमा पेशी सारिदै आएको जनाइएको छ ।

डा. राउत उपर राज्य विरुद्धको विप्लव मुद्दा दायर गरिएको छ । यसअघि सर्वोच्च अदालतले त्यही मुद्दामा उनलाई सफाई दिएका हुन् ।

पटक पटक अदालतमा आवश्यक कागजपत्र उपलब्ध नगराएर प्रहरीले यातना दिइरहेको आरोप गठबन्धनका प्रवक्ता अब्दुल खानले लगाए ।