भारतीय गृहमन्त्रीको विवाहपँचमीमा जनकपुर भ्रमण रद्द, योगी आउने ?

न्यूज ब्यूरो, जनकपुरधाम । रामजानकी विवाहपँचमी महोत्सवमा जनकपुरधाम आउने भनिएको भारतीय गृहमन्त्री राजनाथ सिँहको जनकपुरधाम भ्रमण लगभग रद्द नै भएको बताइएको छ ।

प्रदेश नं. २ का आन्तरिक मामिला तथा कानुनमन्त्री ज्ञानेन्द्र कुमार यादवले भारतीय गृहमन्त्री तथा भारत उत्तर प्रदेशका मुख्यमन्त्री सँगै आउने कार्यक्रम रहेपनि मुख्यमन्त्रीको तय भईसकेको छ भने गृहमन्त्रीको जनकपुरधाम आउने कार्यक्रमको औपचारिक पुष्टि अझ भइनसकेको बताए ।

भारतीय गृहमन्त्री राजनाथ सिँह र भारत उत्तर प्रदेश (युपी) का योगी आदित्यनाथ सँगै आउने कार्यक्रम रहेपनि योगीको कार्यक्रम टुँगो लागेपनि गृहमन्त्रीको बारेमा अझै अपुष्टि रहेको बताए ।

भारत सरकारको लगानीमा सुरु हुन लागेको जयनगर जनकपुरधाम कुर्था खण्डको ब्रोडगेल रेललाई मुख्यमन्त्री योगी आदित्यनाथले उद्घाटन गर्ने कार्यक्रमको बारेमा विस्तारित छलफल भईरहेको मन्त्री यादवले बताए ।

मन्त्री यादवले भने, "कार्यतालिका पूर्ण रुपमा बनाएको छैनौ, एक साता अगाडी कार्यतालिका सार्वजनिक गर्नेछौं । मुख्यमन्त्री योगी ज्यूको रेल्वे उदघाटन गर्ने कार्यक्रमको छलफल भईरहेको छ तर अहिले कार्यतालिका भने तय भइनसकेको अवस्था छ । अहिले गृहमन्त्रीको आउने कुरा ओके भईसकेको छैन र रद्द भइसकेको अवस्था पनि भइसकेको छैन । मुख्यमन्त्रीको स्वागतको लागि तयारी गरिरहेका छौँ ।"

त्रेताकालिन युगमा मर्यादा पुरुषोत्तम भगवान श्रीराम र जगत जननी माता सीताको विवाह भएको स्मरणमा त्यही विधि अनुरुप अहिलेसम्म जनकपुरधाममा प्रत्येक वर्ष विवाहपँचमी महोत्सव मनाइदै आएको छ ।

योगी आउने कार्यक्रम तय भएपछि नियमित रुपमा सुरक्षा जाँच र सुरक्षा व्यवस्थाको बारेमा छलफल सहित अहिलेदेखि नै सुरक्षा अभ्यास थालिएको छ ।

जानकी मन्दिरका छोटा महन्त राम रोशन दासले प्रत्येक वर्ष मनाइने रामजानकी विवाहमहोत्सवमा हजारौ हजार दर्शालुहरु आउने गरेको भन्दै यसपाली भगवान रामको नगरी अयोध्या पर्ने युपीका मुख्यमन्त्री स्वयं नै आउन थालिएपछि जनकपुरधाममा उनको स्वागतको तयारी भने भिन्न प्रकारले भईरहेको बताए ।

उनले भने, "प्रत्यके वर्ष धरोधर पर्वको रुपमा मनाउँदै आएका छौँ । प्रत्येक वर्ष अनौपचारिक रुपमा भएपनि अयोध्याबाट साधुसन्त आउने गरेको छ । तर यसपाली मुख्यमन्त्री योगी आदित्यनाथ आफैँ आउन थालेपछि खुसीको सीमा रहेको छैन । जसरी त्रेता यूग विधि विधान भएको थियो त्यसरी नै गरिरहेका छौँ । युपी राज्यमा पर्ने अयोध्याको अभिभावकको रुपमा रहेको मुख्यमन्त्री योगी एक हजार साधुसन्तलाई नेतृत्व गर्दै आउन थालेपछि स्वागतको तयारी पनि त्यसै हिसाबले गर्न लागिएका छौँ ।"

योगी आदित्यनाथ र गृहमन्त्री राजनाथ सिंह जनकपुरधाम आउने कार्यक्रमको बारेमा यसअघि नेपालका लागि भारतीय राजदुत मञ्जिव सिंह पुरीले अनौपचारिक जानकारी गराएका थिए । भारतमा हुन लागेको चुनावलाई मध्यनजर गर्दै भारतीय जनता पार्टीका नेता एवम् वर्तमान सरकारका गृहमन्त्री समेत रहेका सिँह आउने पक्कापक्की भने भइनसकेको बुझिएको छ । यस बारे प्रदेश नं. २ का सरकाले एक साताअघि मात्र पूर्ण कार्यक्रम जानकारी गराउने छ ।

यसै सन्दर्भमा जनकपुरधाम उपमहानगरपालिकाका मेयर लालकिशोर साहले युपीका मुख्यमन्त्री योगी आउने निश्चित नै रहेको बताएका छन् । भारतीय प्रधानमन्त्री मोदी आउँदा जुन एटिआरको विमानबाट आएका थिए त्यसै अनुरुप योगी पनि आउने कार्यक्रम रहेको छ ।

"एटियार विमानबाट जनकपुरधाम एयरपोर्टमा आउने छ र त्यसै दिन फर्किने कार्यक्रम रहेको छ । मोदी जी पनि त्यही विमानबाट आउनुभएको थियो । उहाँ पनि त्यही विमानबाट एयरपोर्टमा ओर्लिने कार्यक्रम छ । एयरपोर्टबाट उहाँ जानकी मन्दिरको लागि प्रस्थान गर्नुहुने छ ।" मेयर साहले भने ।

मुख्यमन्त्री योगीको स्वागतको तयारी प्रदेश नं. २ का सरकारले तीव्र रुपमा थालेका छन् । उनको स्वागतमा मधेश भवनमा १ हजार १ मूर्तेको भण्डाराको समेत व्यवस्था गरिएको जनाइएको छ ।

प्रदेश सरकारले अतिथि देवो भवः को पालना गर्दै भारत वा अन्य कुनै देशबाट आउने गरेका कुटनितिक सरोकारका व्यक्तिहरुको स्वागत तथा सुरक्षाको बारेमा सदैव कुशलतापूर्वक कार्य गर्दै आएको छ ।

भारतको अयोध्यामा राम मन्दिर निर्माणलाई लिएर चर्चामा रहेका मुख्यन्त्री योगी विवाहपँचमीमा जनकपुरधाम आउन लागिएपछि हजारौँ नभएर यसपाली लाखौँको सँख्यामा श्रद्धालुहरु विवाहपँचमीमा जनकपुरधाम आउने विश्वास जानकी मन्दिरका छोटा महन्थले दर्साए ।