धामी झाँक्रीको चक्करमा १६ बर्षिय नवयुवकको मृत्यू  !

विनय कुमार यादव, धनुषा । धनुषामा एक १६ बर्षिय नव युवकको धामीझाँक्रीको चक्करले ज्यान गएको छ ।

धनुषा जिल्लाको धनुषाधाम नगरपालिका वडा नं. २ सिसमपुरको राम कुमार कापरको छोरा बर्ष १६ का राम अजौधी कापरको ज्यान गएको स्थानीयवासीहरुले बताएका छन् ।
कापरलाई विरामीका कारण शरिरमा रगतको कमि भएको थियो । अत्यधिक दुब्लो हुँदै गएका उनलाई स्थानीय धामी झाँक्रीमै सीमित रहँदा उनको मृत्यू भएको हो ।

दुईदिन देखि कापरलाई पेट दुख्दा समान्य उपचार गरिएको थियो । त्यसपछि पनि स्वास्थ्य अवस्थामा सुधार नआएपछि गत मँसिर २ गते १ बजे राति पपुलर अस्पताल धनुषाधाममा ल्याइएको थियो ।

चिकित्सकहरुले चेकजाँच गर्दा शरिरमा हेमोग्लोबिन (रगत) कमि देखिएको थियो । एक स्वस्थ्य व्यक्तिको शरिरमा औसत ५ देखि ६ लिटर रगत तथा HB 12-18 हेमोगुलोबिन हुनुपर्नेमा ३.५ मात्र रहेको जानकारी गराएपनि उनको परिवारले उनलाई पुनः चिकित्सक कहाँ नलगि धामीझाँक्रि कहाँ पुरयाएको थियो । कापरको गत मँसिर ६ गते मृत्यू भएको परिवारजनले जनाएको छ ।

पहिले एक पटक त विरामी हुँदा स्थानीय धामीसँगै देखाउँदा विरामी ठिक भउको थियो । केही प्राथमिक उपचार गरयौ, त्यसपछि पनि सुधार नभएपछि स्थानीयहरुले धामीलाई देखाउँ भनेपछि हामी पुनः धामी कहाँ लगेर उपचार गराएका थियौ तर बाँचेनन उनी । मृतकका काका राम नन्दन कापरले भने ।

मृतकको वुवा राम कुमार कापर भने वैदेशिक रोजगारीको क्रममा विदेश बस्दै आएको छ । मृतककी आमा कुमारी देबि कापरले धामी झाँक्रिमा लागेकै कारण मृत्यू भएको स्थानीयहरु बताउँछन् ।