उपेन्द्र यादवले मधेसी डाक्टर उपर अन्याय गरयो : डा. पँजियार

न्यूज ब्यूरो, जनकपुरधाम । मधेसी चिकित्सक संघका प्रवक्ता डा. विनय पँजियारले संघीय सरकारका स्वास्थ्यमन्त्री उपेन्द्र यादवले मधेसी चिकित्सकहरुसँग अन्याय गरेको आरोप लगाएका छन् ।

सर्वोच्च अदालतले स्वास्थ्य सचिवको लागि डा. चौधरीको पक्षमा अन्तरिम आदेश जारी गरिसकेको भएपनि डा. शुशिलनाथ प्याकुरेललाई बहालबाला सचिव हुँदाहुँदै आर्थिक र प्रशासनिक जिम्मेवारी गैरन्यायकि तरिकाले दिएको भन्दै सर्वोच्च अदालतको अन्तरिम आदेश बमोजिम डा. चौधरीलाई उक्त जिम्मेवारी सहित स्वास्थ्य सचिवको रुपमा कामकाग गर्ने वातावरण सिर्जना गर्नुपर्ने माग अघि सारेका छन् ।

न्यूज ब्यूरोसँग कुराकानी गर्दै प्रवक्त डा. पँजियारले, स्वास्थ्य तथा जनसँख्या मन्त्री यादवले मधेसी चिकित्सकहरुसँग डिल गर्न लागेको आरोप लगाउँदै मधेसी भएकै कारण सप्तरी निवासी स्वास्थ्य सचिव डा. पुष्पा चौधरीलाई जिम्मेवारीबाट हटाइएको आरोप लगाए ।

उनले भने, "स्वास्थ्य सचिव तथा आर्थिक र प्रशासनिक जिम्मेवारी पहिले डा. पुष्पा चौधरीले सम्हाल्दै आएकी थिइन, तर मन्त्री ज्यूले उनलाई हटाउनुभयो, पदीय जिम्मेवारी खोसीयो । उहाँले अदालतमा मुद्दा हालेपछि सर्वोच्च अदालतले डा. चौधरीको पक्षमा अन्तिरिम आदेश गरेको छ । तैपनि अहिलेसम्म उनलाई जिम्मेवारीबाट पर राखिएको छ । उहाँलाई पदमुक्त गरेर डा. शुशिलनाथ प्याकुरेललाई जिम्मेवारी सुम्पनु गैर न्यायिक निर्णय हो । यो निर्णयलाई सच्चाएर सर्वोच्च अदालतको अन्तिरिम आदेश बमोजिम डा. चौधरीलाई उक्त जिम्मेवारी दिनुपर्छ ।"

सोमबार मधेसी चिकित्सक संघको एक प्रेस विज्ञप्ति जारी गर्दै सुनसरीको धरान स्थित विपी कोईराला स्वास्थ्य विज्ञान प्रतिष्ठानमा मौलाउदै गएको अनियमितता र भ्रष्टाचारको सम्बन्धमा समेत ध्यानाकर्षण गराउँदै उक्त प्रतिष्ठानमा साढे ५ लाखको चेक काण्ड, देब्रे हात नभएको भारतीय नागरिकलाई रेडियोलोजीमा भर्ना गरिएको, भवन निर्माणको बखत भएको अनियमितताहरुलाई पर्दाफास गर्न तथा दोषीलाई पत्ता लगाउनको लागि निष्पक्ष छानबिन गर्नुपर्ने माग समेत अघि सारेका छन् ।

यसका साथै, नाम्स ( NAMS )अन्तर्गत रिक्त रहेका सम्पूर्ण पदहरु प्रक्रिया पुरा गरी पदाधिकारी नियुक्ती गर्न माग समेत गरेका छन् ।