श्रीमान विदेशमै घरजम गरेर मस्त, नेपालमा श्रीमतीको बिच्चली

बिनय यादव, सिरहा । ‘वो घर चैल अईबतै त भजैतै, आरो हमरा किछो नै चाही’ (श्रीमान घर फर्किदिए मात्रै हुन्थ्यो, मलाई अरु केही चाहिन्न) सिरहाको कर्जन्हा नगरपालिका ११ की ३५ वर्षीया अरहुलिया महतो आशालाग्दो स्वरमा भन्छिन् । अरहुलीयाको श्रीमान मलेसिया गएको झण्डै १५ भईसक्यो तर, अझै फर्केका छैनन् । विवाह भएको २ वर्ष नपुग्दै उहाँका श्रीमान कुसुमलाल महतो रोजगारीको शिलशिलामा मलेसिया जानुभएको थियो ।

भनिन्छ, नारी–पुरुष एक अर्काका परिपूरक हुन् । अर्थात् श्रीमान श्रीमती एक रथका दुई पाङ्ग्रा । यात्राका क्रममा रथ चलाउन दुबै पाङ्ग्रा आवश्यक पर्दछ । एउटा मात्रै पाङ्ग्रा प्रयोग भयो भने यात्रा अधुरो र अपुरो रहन्छ । जहाँ प्रेममय सम्बन्ध हुन्छ त्यहाँ श्रीमतीलाई दुख्यो भने श्रीमानले त्यो दुखाइको महसुस गर्छ । श्रीमानलाई दुख्यो भने श्रीमतीले त्यो दुखाइको महसुस गर्छिन् । तर, यहाँ एक श्रीमतीले आफ्नै श्रीमान र घर परिवारबाट तड्पी रहेकी छिन् । पत्नीले विश्वाश गरेर बिदेश जान सहर्ष स्विकारेका पतीले जब उनैलाई धोका दिएर पर नारीसित नारिन्छन्, आफ्नै पत्नीलाई विश्वाशघात गर्छन् तब त्यसको पीडा कति हुन्छ ? उनको जाने ठाउँ कहाँ हुन्छ ? टेक्ने हाँगो कता हुन्छ ? यहि विश्वाशघात, पीडा र बेदनाको कथा हो अरहुलियाको ।

समाजिक परम्परा अनुसार १७ वर्षअघि कर्जन्हा नगरपालिका वडा नम्बर ६ बेतहाकी अरहुलिया र सोही नगरपालिका वडा नम्बर ११ बगहाका किसुनलाल महतोबीच विवाह भएको थियो । अरहुलियालाई अझ झल्झली याद छ त्यो दिन । बन्धनमा बाँधिएपछि दिनहरु बित्दै गयो । बिहे भएको करीब २ वर्षपछि श्रीमान कुसुमलाल महतोले विदेश जान्छु भने । उनले रोक्न सकिनन् । विदेशिएको दुई अढाई वर्षसम्म सम्पर्क भइरहयो, २–३ वर्षसम्म पैसा पनि पठाइरहयो । तर, त्यसपछि विस्तारै विनाकारण सबै बन्द भयो । सुरु सुरुमा फोन नआउँदा काममा व्यस्त भएर होला भनेर सोचिन् । प्रायः धेरैजसोलाई अहिलेको भौतिकवादी सोच र अति महङ्गीमा घर व्यवहार चलाउन निक्कै मुस्किल भएकै हो । मानिसहरु पैसा कमाउन निक्कै भागदौड गरिरहेको अवस्था छ । उनले भनिन्, ‘प्रायः जसो काममा व्यस्त होलान्, घरपरिवारलाई समय दिन नसक्ने बाध्यता धेरै नै सिर्जना भइरहेको हो कि भनेर सोँचे ।’ हरेक श्रीमान श्रीमतीले पनि यस्तै कुराहरु बुझ्दै आएको छ । तर, वास्तविकता भने त्यो थिएन । त्यो भयो जुन कल्पना बाहिरको थियो । विदेश जाँदा नरुनु है म छिट्टै फर्किन्छु भनेर आश्वासन दिएर गएका श्रीमानले मलेसियामा इन्डोनेसियन युवतीसँग घरजम गरेको रहेछ । थाहा पाएपछि संसार नै उल्टो भएजस्तो अनुभब भयो उनलाई ।

श्रीमानबाट छिट्टै घर फर्कने आश्वासन पाएकी अरहुलियाको मन अहिले दिनप्रतिदिन भक्कानिएको छ । श्रीमानलाई गरेको विश्वास अहिले विश्वासघातमा परिणत भएपछि आँखाबाट बलिन्द्र आँसु झार्ने र मन कोक्याउँदै सहनुपरेको छ । पतीलाई गरिएको विश्वास तोडिएपछि उनको कुरा गर्यो कि अरहुलिया रुन थाल्छिन् । आर्थिक अवस्था सम्पन होस् वा विपन्न, दुःख सुख दुवैले साझेदारी गर्नुपर्नेमा विदेश गएर श्रीमानले अर्को बिहे गरेको सुन्दा कुन महिलाको छाती पोल्दैन ?

उनी भन्छिन्, ‘घर फर्केर आउलान भन्ने आशै आशमा वषौँ बितिसक्यो । तर, घर आउने कुरै गर्नुहुन्न । विदेश गएको झण्डै १५ वर्ष भइसक्यो, फोन पनि गर्नुहुन्न, उता अर्कै बिहे गरेर आनन्दले बस्नुभएको छ, यता मलाई खान र बस्न समेत समस्या भएपछि अहिले माइतीमा बस्दै आएकी छु ।’ उनी भक्कानिदै सुनाउँछिन्, ‘मेरा बालबच्चा पनि छैनन्, नागरिकता पनि छैन्, नागरिकताको सिफारिसका लागि महिनौदेखि भौतारिँदा पनि कोहीले बनाई दिएनन्, वडा अध्यक्षले पनि सिफारिस दिएनन् । न्यायको लागि हरेक निकायसँग हार गुहार गरें । तर, कसैले सुनिदिएनन् ।’

उनको दाजु भन्छन्, ‘उसको श्रीमान विदेशमा अर्को बिहे गरेको छ, पैसा पनि पठाउँदैन, बहिनीले जीवन सुखीसँग बिताउँछिन् भन्ने विश्वासले बिहे गर्दा पनि अहिले दुःखमा परेको देखेर पछुताउनु परेको छ, सासूससुराको मृत्यु भइसकेको छ, केही जग्गा जमिन भएपनि उसकोे दाजुभाईहरुले दिन चाहँदैन, नागरिकता पनि बनाई दिँदैन ।’ उनले जिल्ला प्रहरी कार्यालय सिरहाको महिला सेलमा निवेदन दिएपनि श्रीमान विदेशमा हुञ्जेल केहि हुन नसक्ने जवाफ पाएर फर्किए ।

श्रीमानले मलेसियामै दोस्रो विवाह गरेपछि बिच्चलीमा परेकी छिन् उनी । तैपनि अझ हिम्मत हारेकी छैनन् उनी । न्याय पाउनका लागि उनी आफ्नो संघर्ष जारी राखेकी छिन् । उनी भन्छिन्, ‘मलाई जीवनयपानका लागि व्यवस्था गरोस्, नागरिकता बनाई दिनुपर्यो, मलाई न्याय चाहिएको छ ।’ उनी न्यायका लागि सहयोग गरिदिन सबैलाई आग्रह समेत गरेकी छिन् ।