मधेसको 'राजर्षि जनक युनिभर्सिटी' को पहिलो वार्षिकोत्सव

न्यूज ब्यूरो, जनकपुरधाम । गत वर्ष व्यवस्थापिका सँसदबाट विधिवत पारित भएको तराई मधेसको राजर्षि जनक युनिभर्सिटी (आरजेयू-RJU) ले सोमबार प्रथम वार्षिकोत्सव मनाएको छ ।

दुई दशक लामो र अथक प्रयासपछि आजैका दिन व्यवस्थापिका सँसदबाट उक्त विश्वविद्यालय स्थापनाको लागि हरियो झण्डी पाएको र पारित भएको स्मरणमा प्रथम वार्षिकोत्सव मनाइएको हो ।

नेपालको ११ औँ एवम् कान्छो विश्वविद्यालयको रुपमा स्थापित भएको राजर्षि जनक युनिभर्सिटी अन्तर्राष्ट्रिय स्तरको मापदण्ड अनुकूल हुने गरी सीप र रोजगारमूलक शैक्षिक कार्यक्रमहरु थपिने विश्वास विश्वविद्यालयका रजिष्टार महेन्द्र यादवले जनाए ।

तराई मधेसको लागि संजीवनी र शिक्षा क्षेत्रमा नयाँ आयाम भएको भन्दै बहुप्रतिक्षित रहेको बेला यहाँका जनता, जनप्रतिनीधि र अगुवाहरुले देखाएको चासोलाई झन माथि पुरयाउँदै नेपालको लागि उत्कृष्ट विश्वविद्यालय बनाउन सघाउनुपर्ने आग्रह उपकुलपति प्राचार्य भारत झाले गरे ।

उनले भने, "राजर्षि जनक विश्वविद्यालयलाई उत्कृष्ट बनाउन सबैले मेहनत र राम्रो शिक्षा दिनु पर्ने उपस्थित सम्पूर्ण शिक्षक वर्गहरु कडा मिहिनेतका साथ लाग्नुपर्छ । विश्वविद्यालय स्थापना गर्न नेपाली कांग्रेसका उपसभापति विमलेन्द्र निधिले निर्वाह गरेको भूमिका बिर्सनुहुँदैन ।"

गत वर्ष प्रतिनीधि सभा र प्रदेश सभाको चुनाव अघि नेता निधि, राजेन्द्र महतो, महेन्द्र यादव, उपेन्द्र यादव लगायतका नेताहरुले राजर्षि जनक विश्वविद्यालयको लागि प्रयास गरेको बताएका थिए ।