राजदेवीमा मँगलबार र बुधबार 'खोईच भराई'

न्यूज ब्यूरो, जनकपुरधाम । जनकपुरधामको माता राजदेवीमा आउँदो मँगलबार र बुधबार खोईच भराई कार्यक्रम हुने भएको छ ।

राजा जनककी कुलदेवी मानिएकी माता राजदेवीमा प्रत्येक वर्ष भेटी र खोईच भराईको लागि हजारौँ हजार श्रद्धालुहरुको भीड लाग्ने गर्दछ । यसपाली पनि प्रत्येक वर्षझैँ भाकल गरेकी श्रद्धालु महिलाहरुले आउँदो असोज ३० र ३१ गते अर्थात मँगलबार र बुधबार विधिवत रुपमा खोईच भराई गर्न सकिने आयोजक महाविर युवा कमिटिका अध्यक्ष रोशन शेखर जयसवालले जानकारी दिए ।

खोईच भराई जहिले पनि गर्न सकिने भन्दै अध्यक्ष जयसवालले प्रत्येक वर्ष सप्तमी तिथी र अष्टमी तिथको मात्र शुभ मानिएको भन्दै खोईच भराई त्यही तिथिमा श्रद्धालुहरुले गर्दै आएको जनाए ।

खोईच भराईसँगै भेटी (लडडु, प्रसाद चढाउने) कार्यक्रम समेत सप्तमीको राती १० बजेदेखि पँगतिवद्ध हुने जनाइएको छ ।

महाविर युवा कमिटिको आयोजनामा प्रत्येक वर्ष हुँदै आएको खोईच भराई कार्यक्रम राजदेवी मन्दिरको पश्चिमपट्टिको टहराभित्र हुने आयोजकले जनाएको छ । सन्तानको दीर्घायू सहित अन्य गुहार सहित भेंटी चढाउने भाकल गरिएकी महिलाहरु खोईच भराईमा सहभागी हुने गरिएको छ ।

खोइच भराईको लागि तराई मधेसको विभिन्न जिल्ला सहित भारत विहारको समेत विभिन्न जिल्लाका श्रद्धालुहरु राजदेवी पूजनको लागि आउने गरिएको छ ।