सिडियोलाई ज्ञापनपत्र बुझाउन जादा पक्राउ सिके राउतका सबै कार्यकर्ता रिहा

न्यूज ब्यूरो, सिरहा । सिरहाबाट पक्राउ परेका स्वतन्त्र मधेस गठबन्धनका सबै कार्यकर्ता रिहा भएका छन् ।

प्रहरी हिरासतमा मृत्यु भएका स्वतन्त्र मधेस गठबन्धनका नेता राम मनोहर यादवको घटनाबारे सत्यतथ्य छानबिन तथा उनको न्यायका लागि सिरहाका निमित्त प्रमुख जिल्ला अधिकारीलाई ज्ञापनपत्र बुझाउन जाँदा पक्राउ परेका डा. सिके राउतका ९ जना कार्यकर्ता शुक्रवार रिहा भएका हुन् ।

राम मनोहरको घटनाबारे सत्यतथ्य छानबिनका लागि सिरहा जिल्ला अधिकारीलाई ज्ञापनपत्र बुझाउन जादा प्रहरीले जिल्ला प्रशासन कार्यालय भित्र प्रवेश गर्न नदिएपछि उनीहरूले प्रहरी र सिडियो विरुद्ध नारा धन्काउन थालेपछि गठबन्धनका ९ जना कार्यकर्ता जिप्रकाको प्रवेशद्वारबाट पक्राउ परेका थिए ।

शुक्रबार उच्च अदालत राजविराजमा अबेरसम्म चलेको बहस पश्चात् छोड्ने आदेश जारी भएपछि उनीहरू रिहा भएको जिल्ला प्रहरी कार्यालय सिरहाका प्रवक्ता तथा डिएसपी माधवराज खरेलले जानकारी दिए ।