जनकपुरको सस्ता बजारमा अखाद आईसक्रिम बेच्ने एक व्यापारी पक्राउ

जीतेन्द्र प्रसाद सिँह, जनकपुरधाम । जनकपुरको सस्तो बजार (सस्ता बजार) मा अखाद्य पदार्थ बिक्रि बितरण गर्ने एक व्यापारीलाई अनुगमन टोलीले नियन्त्रणमा लिएको छ ।

जनकपुरको गोपाल धर्मशालामा लागेको सस्तो बजारमा विहिवार अनुगमनको क्रममा अमर आइसक्रिमका विक्रेता विकास दासलाई नियन्त्रण लिएको हो । अनुगमनको क्रममा आइसक्रिममा देखिएको कालो पदार्थ के हो भनेर अनुगमन टोलीले प्रश्न गरेपछि विक्रेता दासले बाख्राको दिसा ( बकरीको नेरी ) रहेको भन्दै अटेरी गरी प्रतिक्रिया दिएपछी उनलाई नियन्त्रणमा लिएको अनुगमन टोलीले जनाएको छ ।

जनकपुर उपमहानगरपालिका वार्ड नं. ८ स्थित मनोज चौधरीले संचालन गरेको अमर आइसक्रिम उद्योगबाट उत्पादित आइसक्रिमहरुमा म्याद समेत नभएको अनुगमन टोलीले जनाएको छ ।

जिल्ला प्रशासन कार्यालयका अधिकृत दिनेश साहको नेतृत्वमा गरिएको अनुगमन टोलीमा नापतौल कार्यालय धनुषाका बिरेन्द्र उपाध्याय, घरेलु तथा साना उद्योग कार्यालयका जितेन्द्र प्रसाद सिंह, जिल्ला प्रहरी कार्यालय धनुषाका प्रहरी हवल्दार शंकर कटुवाल लगायत संचारकर्मीहरुको सहभागिता थियो । केही दिन अघि समेत जनकपुर नगरलाई लक्षित गरी अनुगमन गरिएको थियो । अनुगमनको क्रममा म्याद नाघेको केही सामान समेत नियन्त्रणमा लिइएको थियो ।

हिन्दुहरुको महान पर्व दशैं, तिहार तथा छठलाई मध्यजनर गर्दै जिल्ला प्रशासन कार्यालय धनुषाले अनुगमनलाई तिव्रता दिएको छ । पर्वको समयमा कालाबजार, महंगी बढेको भन्दै जनगुनासोको आधारमा अनुगमनलाई तिव्रता दिएको बताइएको छ ।