महामारीमा ज्यान गुमाएका पीडित परिवारलाई १/१ लाख दिने मुख्यमन्त्रीको घोषणा

मनिष शर्मा , महोत्तरी । महामारीबाट मृत्यु भएका दुई परिवारलाई प्रदेश सरकारले क्षतिपूर्ती स्वरुप एक एक लाख रुपैया दिने घोषणा गरेका छन् ।

प्रदेश न.२ का मुख्यमन्त्री लाल बाबु राउत गद्दीले यसै महिनाको पहिलो साता जलेश्वर नगरपालिका वडा न. १२ नैन्हीमा फैलिएको महामारीबाट एक बच्चा र एक बृद्धाको मृत्यु भएकोले सोहि वडा स्थित मदरसामा आयोजित कार्यक्रम सम्बोधन गर्दै मृतकका परिवारहरुलाई उक्त क्षतिपूर्ती रकम दिने घोषणा गरेका हुन् ।

उनले नैन्ही गाउँभरीनै ठाउँ ठाउँमा धारा लगाउनका साथै स्वच्छ पानी सप्लाई गराउन प्रदेश सरकार समक्ष माग गर्न जलेश्वर नगरपालिका प्रमुखलाई निर्देशन समेत दिएका छन् । साथै मुख्यमन्त्री राउतले शिक्षामा जोड दिदैे शिक्षा बिनाको मानिस पशु समान हुने बताएका छन् ।

महामारी फैलिनुको मुल कारण जन चेतनाको अभाव र अशिक्षा रहेकोले राउतले शिक्षाप्रति जोड दिएका हुन् । शिक्षाप्रति सजग भई छोरा र छोरी दुबैलाई समान व्यवहार गर्न र शिक्षा प्रदान गर्न त्यहाँका प्रत्येक नागरीकसँग मुख्यमन्त्री राउतले आग्रह पनि गरे ।