जनकपुरधाममा वडाध्यक्षकै घरमा चल्यो डोजर, घर भत्काइयो !

न्यूुज ब्यूरो, जनकपुरधाम । सडकमा परेको घर टहरा हटाउन बारम्बार सूचना जारी गरेपनि अटेरी गर्दै आएका वडाध्यक्षको घरमा आईतबार डोजर चलाइएको छ ।

जनकपुर उपमहानगरपालिका–९ का वडा अध्यक्ष परमेश्वर साहको घरमा डोजर चलाइएको हो । बाटो विस्तारको क्रममा बाटोमा परेको वडाध्यक्ष साहले घर भत्काउन नमानेपछि उनीसहित उनको परिवारलाई प्रहरीले नियन्त्रणमा लिएर घरमा डोजर चलाउँदै घर भत्काए हुन।

नगरपालिकाले लामो समयदेखि त्यो सडकखण्डको सडकमा पर्ने घर टहरा भत्काउन सूचना जारी गरेपनि आफू वडाध्यक्ष भएको भन्दै अटेरी गर्दै आएका थिए । आईतबार नगरपालिका कार्यालयको सूचना र आग्रहको आधारमा वडाध्यक्ष सहित उनका परिवारलाई जिल्ला प्रहरी कार्यालय धनुषाको नियन्त्रणमा राखेर घर भत्काइएको हो ।

वडाध्यक्ष साह नेपाली काँग्रेस पार्टीबाट वडाध्यक्षमा विजयी भएका जनप्रतिनीधि हुन् । नगरपालिका कार्यालयले जनकपुरधामको विभिन्न सडकखण्ड विस्तार कार्य जारी राखेको छ ।