भोजको फोहोर सफा नगरेको भन्दै स्कूलबाट निकालिए दलित विद्यार्थी !

न्यूज ब्यूरो, बर्दिवास । जातपात छुवाछुत विरुद्धको नारा सरकारले घन्काइरहेका बेला महोत्तरीमा एक दलित विद्यार्थी विद्यालयबाट निकालिएका छन् ।

महोत्तरी जिल्लाको भङ्गाहा नगरपालिका वडा नं. ९ हरिनमरीका सिकिन्दर मरिक डोमका १२ वर्षीय छोरा मुकेश आफ्नै बस्तीको किशोरी जनता माविबाट निकालिएका हुन् । कक्षा ७ का मुकेशले आफूलाई प्रधानाध्यापक मनोहरप्रसाद यादवले निष्काशन गरेको बताएका छन् ।

विद्यालयबाट निष्काशित मुकेश आपूमाथि न्याय हुनपर्ने भन्दै अहिले बस्तीका भद्रभलादमी गुहारिरहेका छन् ।

आफूलाई विद्यालय परिसरमा छरिएको फोहर सफा नगरेको निहुँमा निष्काशन गरिएको पीडितको भनाइ छ । विद्यालयमा गत असोज १० गते लेखापाल राकेश यादवकी हजुरआमाको क्रियाभोज खाँदा मिल्किएको फोहर सफा नगरेको भन्दै निष्काशन गरिएको पीडितले बताएका छन् । मुकेशका आमाबाबुले पनि आफूहरुलाई नीच जातको भनेर प्रअले हेपेको बताएका छन् । पिता हरिनमरीले आफूलाई पनि प्रअले बारम्बार फोहर सफा गर भन्दै हप्काएको बताएका छन् ।

असोज १० गते विद्यालय नै बन्द गरेर परिसरमा खुवाइएको भोजका जुठा पात डोम भएकै कारण आफ्नो छोरालाई सफा गर्न लगाइएको उनका पिताको भनाइ छ । विद्यालयबाट निष्काशित मुकेश आपूमाथि न्याय हुनपर्ने भन्दै अहिले बस्तीका भद्रभलादमी गुहारिरहेका छन् । प्रअ यादवले फोहर सफा गर्न आफूसमेत सरीक रहेको बताएका छन् ।

समाचार श्रोत : पत्रकार अजय अनुरागी र लोकान्तर अनलाईन
समाचारको अरिजिनल लिंक : http://lokaantar.com/samachar/56867