भारतीय मन्त्री प्रधानलाई धनुषाधाममा अभिनन्दन, भारतको सहयोगमा तालिम केन्द्र निर्माण हुँदै

न्यूज ब्यूरो, जनकपुरधाम । भारतीय पेट्रोलियम तथा प्राकृतिक ग्यास मन्त्री धर्मेन्द्र प्रधानलाई धनुषाधाममा स्वागत तथा अभिनन्दन गरिएको छ । उहाँलाई धनुषाधाममा फुलमाला लगाएर स्वागत तथा अभिनन्दन गरिएको हो ।

कार्यक्रममा उहाँले हिन्दु धर्मावलम्बीहरुको धरोहर धार्मिक रामायण सर्किट त्रैतायुगिन प्राचीन धार्मिक पबित्र तिर्थस्थल धनुषाधामस्थित धनुष मन्दिरमा दर्शन र पुजा पाठ गर्नुभएको छ । काठमाडौंबाट सिधै हेलिकप्टरबाट धनुषाधाममा अवतरण गरेका मन्त्री प्रधानले नेपालमा समृद्धिका लागि युवालाई सीपको आवश्यकता औल्याउँदै भारतले सहयोग गर्ने प्रतिवद्धता जाहेर गर्नुभयो ।

“शिव–धनुषबाबा” मन्दिरमा पुजा तथा दर्शन पश्चात् विश्व पर्यटकिय एवं प्रसिद्ध धार्मिक आस्थाका केन्द्र ऋषिमुनिको तपोधाम जनकनन्दनी माता सिताको जन्मभुमि जनकपुरधाममा जानकी मन्दिरको दर्शन गर्ने कार्यक्रम रहेकोे छ । उहाँसँगै नेपाल सरकारका उद्योग वाणिज्य तथा आपूर्ति मन्त्री मातृकाप्रसाद यादव समेत रहनुभएको छ ।

मन्त्री यादवको विशेष पहल तथा भारतीय सरकारको सहयोगमा दश बिघामा बहुउद्देश्यीय सीप मुलक तालिम केन्द्र भवन निर्माणका लागि छनोट गरिएको धनुषाधामको स्थलगत अनुगमन गरिएको छ । मन्त्री यादवले भवन निर्माण नहुन्जेल हाललाई घर भाडामै लिएर भएपनि तालिम चाडै सञ्चालन हुने अश्वासन दिनुभयो ।

कार्यक्रममा धनुषा क्षेत्र नं. १ का प्रतिनिधिसभा सदस्य एवं उद्योग वाणिज्य तथा आपूर्ति मन्त्री मातृकाप्रसाद यादव, भारतीय राजदुत मन्जिब सिंह पुरी, धनुषा क्षेत्र नं. १ “ख” का प्रदेशसभा सदस्य रामचन्द्र मण्डल, स्थानीय जनप्रतिनिधि, विभिन्न राजनीतिक दलका स्थानीय नेता, समाजसेबी, बुद्धिजिवी, स्थानीबासी लगायतको उल्लेख्य सहभागिता रहेको थियो ।