मिर्चैयामा वडा कार्यालय उद्घाटनको विषयमा कुटाकुट, ४ घाईते, २ को बिराटनगर रिफर

न्यूज ब्यूरो, सिरहा । सिरहाको मिर्चैया नगरपालिका–८ मा वडा कार्यालयको उद्घाटन सम्बन्धमा विवाद हुँदा चारजना घाइते भएका छन् । वडा ८ भगतपुरमा नव निर्मित वडा कार्यालयको भवन उद्घाटनको विषयमा विवाद हुँदा दुई पक्षीय झडपमा परी ४ जना घाईते भएका हुन् ।

विवादपछिको झडपमा परी अर्का पक्षको प्रहारबाट स्थानीय ४४ वर्षीय राम अशिष यादव र उहाँका दाई ५५ वर्षका मनिकलाल यादव गम्भीर घाईते भएका छन् । दुबैको टाउको फुटाएको छ भने शरिरको विभिन्न भागमा गम्भिर चोट लागेको छ । उनीहरुको मिर्चैयास्थित मंगलम हस्पिटलमा सामान्य उपचारपछि थप उपचारका लागि बिराटनगरस्थित न्यूरो अस्पतालमा रिफर गरिएको छ ।

त्यस्तै, झडपमै स्थानीय ३४ वर्षीय मनोज कुमार यादव र विष्णु यादव सामान्य घाइते भएका छन् । उनीहरुको मिर्चैयास्थित मिर्चैया नर्सिङ होममा उपचार भइरहेको जनाइएको छ ।

प्राप्त जानकारी अनुसार, उपभोक्ता समितिले ११ लाख रुपैयाँको लागतमा निर्माण गरेको तीन कोठे वडा कार्यालयको भवन मिर्चैया नगरपालिकाका मेयर श्रवण कुमार यादवको उपस्थितिमा हस्तान्तरणको कार्यक्रम बुधवार राखिएको थियो । हस्तान्तरण कार्यक्रम रहेपनि ब्यानरमा उद्घाटन कार्यक्रम उल्लेख भएपछि विवाद चुलिएको थियो । वडा अध्यक्ष राम जगत यादवले हस्तान्तरण कार्यक्रममा उद्घाटनको ब्यानगर देखेपछि प्रतिवाद गरेका थिए । वडाध्यक्ष यादव भने भोली असोज ११ गते उद्घाटन हुने भनेर उपस्थितिका लागि सबैलाई पत्राचार गरेका थिए । वडाध्यक्ष यादव नेपाली कांग्रेसबाट निर्वाचित भएका हुन् भने अर्का पक्ष तत्कालीन माओवादी पक्षका हुन् ।

दुई पक्षबीचको भनाभन उग्र भएपछि कुटाकुट हुन पुगेको ईलाका प्रहरी कार्यालय मिर्चैयाका डिएसपी दिपेन्द्र शाहले बताउनुभयो ।